Elordada otandyq kásipkerlerdi qoldaý tetikterin talqylaý maqsatynda «Samruk Business Forum» sharasy bastaldy, dep habarlaidy QazAqparat.
Jiynǵa Úkimet basshysy Asqar Mamin, «Samuryq-Qazyna» UÁQ» AQ basqarma tóraǵasy Ahmetjan Esimov, «Atameken» UKP basqarma tóraǵasy Abylai Myrzahmetov qatysýda.
«Damyǵan elderdiń ónerkásiptik jáne saýda boiynsha protektsionizmderin baqylai otyryp, álemdik ekonomikanyń qubylmaly sipaty saqtalyp turǵanyn baiqaimyz. Byltyr álemdik saýdanyń ósý qarqyny 1 paiyzǵa tómendep, keiingi jyldardaǵy eń tómengi kórsetkishti kórsetti. Ókinishke qarai álemdik saýda jáne ónerkásiptik protsesterin tejeýshi basty faktordyń biri – koronavirýs bolyp tur. Bedeldi qarjy institýttary álemdik ekonomikanyń 2020 jyly 2,8 paiyzǵa quldyraitynyn boljaidy. Bul – 2009 jylǵy qarjylyq daǵdarystan keiingi eń tómengi kórsetkish», - dedi Asqar Mamin forýmnyń ashylýynda.
Úkimet basshysynyń aitýynsha Qazaqstannyń barlyq iri saýda seriktesterinde ósim qarqyny tómendeitini jaily boljam bar.
«Syrtqy suranystyń aitarlyqtai tómendeýine bailanysty ishki jáne syrtqy naryqta básekeniń qyza túseri anyq. Osyǵan bailanysty biz qosymsha sharalardy qabyldap, óndiris pen jumys oryndaryn saqtap qalýymyz kerek. Singapýr, Japoniia, Ońtústik Koreia, AQSh, Germaniia qatarly ekonomikasy damyǵan memleketterdiń tájiribesi kórsetip otyrǵandai ulttyq ekonomikanyń turaqty ósimi ishki óndiris pen ónerkásiptik ózin-ózi qamtý deńgeiine qarai qalyptasady. Sonymen qatar shaǵyn jáne orta biznes salasyndaǵy kásiporyndardyń arasyndaǵy tyǵyz kooperatsiia – mańyzdy qadamdardyń biri. Búgingi forýmǵa shaǵyn jáne orta biznes salasyndaǵy 200-ge tarta kásiporynnyń ókilderi qatysýda. Osylaisha tapsyrys berýshi men ulttyq kompaniialar, óndirýshiler arasyndaǵy dialog ornatylýda», - dedi ol.
Asqar Mamin «Samuryq-Qazyna» qory el ekonomikasyn damytýǵa eleýli úles qosyp otyrǵanyn aityp ótti.
«Jyl saiyn satyp alý kólemi 4 trln teńgege jetip otyr. Bul rette osy kólemdi ishki naryqtyń múddesine tiimdi túrde paidalaný bilý kerek. «Samuryq-Qazyna» qorynyń shaǵyn jáne orta biznes salasynda áleýeti úlken. Qordyń árbir enshiles kompaniiasynyń ózindik mańyzy bar. Keibiri óz aimaqtarynyń basty kompaniialaryna ainalyp otyr. Osyǵan bailanysty Úkimet óńdeý ónerkásibi salasynda otandyq óndiris áleýetin damytý boiynsha josparly jumysty jalǵastyryp keledi. Uzaq merzimdi kelisimder men mehanimzder jumys istep tur», - dedi Premer-ministr.
