QR Premer-Ministri Asqar Mamin Nur-Sultan qalasyna Ortalyq Aziia men AQSh elderi arasyndaǵy dialogty damytý jónindegi «S5+1» otyrysyna qatysýǵa resmi saparmen kelgen AQSh memlekettik hatshysynyń saiasi máseleler jónindegi orynbasary Devid Heilmen kelissózder ótkizdi, dep habarlaidy "Ult aqparat" primeminister.kz saityna silteme jasap.
Taraptar 2018 jyly AQSh-qa resmi sapar aiasynda QR Tuńǵysh Prezidenti – Elbasy Nursultan Nazarbaev pen AQSh Prezidenti Donald Tramp arasynda qol jetkizilgen ýaǵdalastyqtardy iske asyrýdyń mańyzdylyǵyn atap ótti.
Kelissózder barysynda ekijaqty saýda-ekonomikalyq jáne investitsiialyq yntymaqtastyqty damytýdyń ózekti máseleleri talqylandy. AQSh — Qazaqstan ekonomikasynyń iri investorlarynyń biri. 2005 jyldan 2018 jyl aralyǵynda AQSh-tan Qazaqstanǵa tikelei investitsiialardyń jalpy aǵyny $40 mlrd qurady. Ótken jyldyń qorytyndysy boiynsha QR-ǵa amerikalyq investitsiialar jańa rekord ornatyp, $5,3 mlrd qurady. Biylǵy qańtar–maýsym aralyǵynda eki el arasyndaǵy taýar ainalymy $1,1 mlrd qurady, bul ótken jyldyń sáikes kezeńindegi kórsetkishten 31,8% joǵary.
Devid Heil Qazaqstannyń AQSh investorlary úshin tartymdylyǵyn atap ótti.
«Bizde ekonomikalyq qatynastardy damytýdyń úlken áleýeti bar», — dep Asqar Mamin, elderdiń energetika, aýyl sharýashylyǵy, densaýlyq saqtaý, aqparattyq tehnologiialar, logistika, týrizm, aviaǵarysh ónerkásibi salalarynda ózara tiimdi yntymaqtastyqty tereńdete túsýdiń perspektivalaryn atap ótti. — Sizdiń elimizge resmi saparyńyz elderdiń ózara is-qimylyn nyǵaitýǵa eleýli serpin bererine senimdimin».
