QR Premer-Ministri Asqar Mamin jumys sapary aiasynda Aqmola oblysynda kóktemgi egis jumystarynyń júrgizilý barysyn tekserdi, dep habarlaidy "Ult aqparat".
Biyl Aqmola oblysynda jazdyq egis aýmaǵy 4,9 mln ga quraidy, onyń ishinde 4,4 mln ga – dándi daqyl. Búgingi tańda 581 myń ga (jospardyń 13,1%) dándi jáne dándi-burshaqty daqyldar, 39 myń ga astam maily (15,5%) jáne 51 myń ga mal azyǵy (28,4%) daqyldary egilgen.
Egis jumystaryna shamamen 32 myń birlik aýyl sharýashylyǵy tehnikasy jumyldyrylǵan, atap aitsaq, 14 myńnan astam traktor, 16 myń tuqym sepkish, 1 250 egis kesheni. Óńirde kóktemgi egis jumystaryn júrgizýge 68 myń tonna kepildendirilgen dizel otyny bólindi, onyń quny Memleket basshysynyń tapsyrmasy boiynsha fermerler úshin litri 165 teńgege deiin arzandatylǵan.
Aýyl sharýashylyǵy daqyldaryn egýdi ońtaily merzimde – 20-25 jumys kúni ishinde aiaqtaý kózdelgen.
Úkimet basshysy Sandyqtaý jáne Aqkól aýdandarynyń alqaptaryndaǵy egis jumystarymen, jergilikti aýyl sharýashylyǵy kásiporyndarynyń materialdyq-tehnikalyq bazasymen, dándi jáne jem-shóp daqyldaryn óńdeý jáne tazalaý, sondai-aq et jáne sút ónimderiniń óndirisin keńeitý jobalarymen tanysty.
«Aýyl – el besigi» jobasynyń iske asyrylýyn baqylaý aiasynda Premer-Ministr Sandyqtaý aýdanynyń Maksimovka jáne Balkashino aýyldarynda, sondai-aq Aqkól aýdanynyń Eńbek aýylynda bolyp, onda áleýmettik infraqurylym nysandaryn — abattandyrylǵan turǵyn úilerdi, densaýlyq saqtaý, bilim berý jáne sport mekemelerin aralap kórdi.
Aqmola oblysynyń aýyl sharýashylyǵy jalpy óniminiń kólemi osy jyldyń tórt aiynyń qorytyndysy boiynsha 2019 jyldyń sáikes kezeńindegi kórsetkishpen salystyrǵanda 3,5%-ǵa ósti. Óńdelgen et óndirisi 22,1%-ǵa (19 myń tonna), sút ónimderi 0,4%-ǵa (26 myń tonna), un 29%-ǵa (122 myń tonna) jáne ósimdik maiy 42,1%-ǵa (8 myń tonna) ósti.
Aqmolanyń aýyl sharýashylyǵy ónimin óndirýshileri elorda turǵyndaryn et jáne súttiń shamamen úshten bir bóligimen (33% jáne 34%-ǵa), taǵamdyq jumyrtqamen – 94%-ǵa qamtamasyz etedi. Óńirde et fermalaryn qurý jobalary júzege asyryla bastady, barlyǵy 7600 bas asyl tuqymdy iri qara mal satyp alýmen 111 et fermasy salynady. 2400 bas iri qara malǵa arnalǵan 18 sút-taýar fermasyn ashý jyl saiynǵy sút óndirisin kem degende 40 myń tonnaǵa arttyrýǵa múmkindik beredi.
