QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda «Nurly jer» memlekettik baǵdarlamasynyń iske asyrylý barysy qaraldy, dep habarlaidy "Ult aqparat" primeminister.kz saityna silteme jasap.
QR indýstriia jáne infraqurylymdyq damý birinshi vitse-ministri Qaiyrbek Óskenbaev, Nur-Sultan qalasynyń ákimi Altai Kólginov, Shymkent qalasynyń ákimi Murat Áitenov jáne Batys Qazaqstan oblysynyń ákimi Ǵali Esqaliev, sondai-aq Premer-Ministrdiń orynbasary Roman Skliar baiandama jasady.
Osy jyly «Nurly jer» baǵdarlamasy aiasynda 15 mln sharshy metr turǵyn úi salý josparlanǵan. Halyqtyń áleýmettik jaǵynan osal toptary, az qamtylǵandar men jastar, biýdjettik uiymdardyń qyzmetkerleri qatarynan 32 myńnan asa otbasy jalǵa beriletin jáne kredittik páterlermen qamtamasyz etiledi.
«Qarapaiym zattar ekonomikasy» jeńildikti nesieleý baǵdarlamasy aiasynda qazirgi kezde otandyq qurylys indýstriiasy boiynsha 178 mlrd teńgeni quraityn 33 joba iske asyrylyp jatyr (shyny, armatýra, sanfaians, keramika taqtashalary, lak boiaýlaryn shyǵarý). Olardy iske qosý turǵyn úi qurylysynda qazaqstandyq úlesti 95%-ǵa arttyrýǵa jáne 8 myńdai jańa jumys ornyn qurýǵa múmkindik beredi.
«Qazirgi jaǵdaidaǵy Úkimettiń eń mańyzdy mindeti – qurylys qarqynyn ulǵaitý, halyqty turǵyn úimen qamtý, jumys oryndaryn saqtaý jáne jańa jumys oryndaryn qurý. Búginde qurylys salasynda shamamen 700 myń adam jumys isteidi», — dep A. Mamin, qurylys salasynyń ekonomikanyń negizgi draiverleriniń biri ekenin atap ótti.
Premer-Ministr qurylys maýsymyn ýaqytynda bastaýdy, josparlanǵan turǵyn úi kólemin berýdi jáne bólingen qarajattyń tolyq igerilýin qamtamasyz etýdi tapsyrdy.
Úkimet basshysy ákimderge qurylystyń jedel qarqynyn qamtamasyz etýdi, qarjylandyrý josparlaryn túzetýdi jáne buǵan deiin málimdelgen merzimderdi qaita qaraýdy, sondai-aq qurylystyń málimdelgen kólemi boiynsha barlyq jobalyq qujattamany ázirleýdi aiaqtaýdy tapsyrdy.
A. Mamin Indýstriia jáne infraqurylymdyq damý ministrligine «Atameken» UKP-men birlesip «Qarapaiym zattar ekonomikasy» baǵdarlamasy aiasynda júzege asyrylyp jatqan qurylys indýstriiasy jobalarynyń ýaqytyly engizilýin qamtamasyz etýdi jáne otandyq jańa óndiristerdi qurý jumysyn jandandyrýdy tapsyrdy.
