Búgin Almatynyń Áýezov aýdandyq №2 sotynda belsendi Janbolat Mamai men onyń áieli Inga Imanbaiǵa qatysty azamattyq istiń sotaldy daiyndyǵy aiaqtaldy, dep habarlaidy Dalanews.kz aqparat agenttigi.
Erli-zaiyptylar biyl sáýirde Nur Otan partiiasy Tóraǵasynyń birinshi orynbasary Baýyrjan Baibekti aiyptaityn birneshe videomaterial jariialaǵan bolatyn.
Aita ketý kerek, buǵan deiin ótken eki otyrysta jaýap berýshi tarap onlain-bailanystyń nashar ekenin, protseske jýrnalisterdiń az qatysyp jatqanyn aityp shaǵymdanǵan edi. Búgingi otyrys Janbolat Mamai men onyń advokattary suraǵan ZOOM platformasynda ótti. Sondai-aq, BAQ ókilderiniń kez kelgeni úshin protsess ashyq boldy. Tilshilerge tek eGov portaly arqyly tirkeýden ótý talaby qoiylǵan.
Atalǵan protseste Baýyrjan Baibektiń múddesin zańger Aijan Táshenova qorǵap jatqany belgili. Ol Janbolat Mamai men Inga Imanbaidyń dálel qujattaryn aitylǵan merzimde tapsyrmai, sot talabyn óreskel buzǵanyn atap ótti. Jaýap berýshiler 2 myń betten turatyn jaýapty sotqa bir kún qalǵanda, iaǵni 3 maýsym kúni keshke ǵana ótkizgen.
Táshenovanyń pikirinshe, 2 myń betten turatyn jaýap qujattarynyń ishinde Mamai men Imanbaidyń sózin resmi rastaityn birde-bir qujat joq.
«Men jaýap berýshi taraptyń jaýap qujattarymen tanysyp shyqtym. Alaida, olardyń birde-birinde dálel joq. Qujat degen qol qoiylǵan, mór basylǵan qaǵaz nemese elektrondy úlgidegi qujat bolýy tiis. Onyń ornyna túsiniksiz jazbalar, internet-resýrstarǵa siltemeler, BAQ betterinen alynǵan tsitatalar ǵana bar. Sondai-aq, mór basylǵan qaǵaz da kóp, biraq olardyń eshbiri bizdiń iske qatysty emes», - dedi zańger Aijan Táshenova.
Ol sondai-aq, videoda kórsetilgen derekterdiń árbiri shyndyqqa janaspaityny týraly resmi qujattardy sotqa tapsyrǵanyn málimdedi. Atap aitqanda, «Baibektiń týystaryna tiesili 100 kompaniia», «Atakenttiń», «Qazaqfilmniń», «Esentaidyń» jerleri, sonymen qatar Almatydaǵy aqyly avtoturaqtar jáne ózge de máselelerge qatysty jeke-jeke toqtalyp, árbirine jaýap berdi.
Janbolat Mamai protsess barysynda sýdia Raihan Sartaevanyń da, zańger Aijan Táshenovanyń da sózin birneshe ret bóldi. Sondai-aq, sotqa arqaý bolǵan taqyryptan aýytqyp, qazaq tiline, Baýyrjan Baibektiń turǵylyqty meken-jaiyna qatysty taqyrypta sóiledi. Tiisinshe, sýdia oǵan birneshe ret eskertý jasap, sot tártibin taǵy buzsa protsesten qýatynyn aitty.
Eske salaiyq, buǵan deiin ótken eki otyrysta da sýdia Janbolat Mamaiǵa dál osyndai birneshe eskertý jasaǵan bolatyn.
Zańger Aijan Táshenova da Janbolat Mamaidyń sózi men isi qabyspaityny, onyń sot tóreligine múldem qurmet kórsetpeitinin aitty.
«Janbolat Mamai óziniń úndeýlerinde eýropalyq, halyqaralyq standarttardy jii mysalǵa keltiredi, sot tóreligi ústem qurý keregin aitady. Biraq, ózi shyn ómirde bul aitqandaryn istei bermeidi. Máselen, sotta aiqailaidy, sottyń jabyq ótip jatqanyn aityp shý shyǵarady, sottaǵy negizgi taqyrypty buryp, basqa másele qozǵaidy, dálel beretin merzimdi keshiktiredi. Iaǵni, zań ústemdigi bular úshin bos sóz. Men ózim Eýropada sotta tájiribeden óttim. Ol jaqta bireýdiń syrtynan negizsiz jala jabýǵa eshkimge ruqsat etilmeidi. Óitkeni, árbir adam, onyń ishinde ózin jýrnalist nemese saiasatker sanaityn ár tulǵa biledi – bireýge qatysty aitqan ár sózińe dáleliń bolýy shart. Olai bolmaǵan jaǵdaida seniń aitqanyń bos jala jáne sol úshin sotta jaýap beresiń», - dedi A.Táshenova.
Sot eki tarapty da tyńdap, sotaldy daiyndyqtyń ótkenin, endi negizgi protsess 14 maýsymda bastalatynyn habarlady. Sýdia Raihan Sartaeva alǵashqy otyrystyń ýaqytyn saǵat 10:00-ge bekitken. Alaida, jaýap berýshi tarap bul ýaqytty 9.30-ǵa qoiýdy surady. Sýdia olardyń ótinishin maqul kórdi.
