Densaýlyq saqtaý ministrligine qarasty vedomstvolardaǵy mamandardyń áleýmettik jaǵdaiy rettelmei otyr. Bul týraly Qoǵamdyq densaýlyq saqtaý komitetiniń tóraǵasy Jandarbek Bekshin aitty, dep habarlaidy «QazAqparat» tilshisi.
Búgin Astanada ótken memlekettik qyzmetshilerdiń ádeptilik normalaryn jáne minez-qulyq qaǵidalaryn saqtaý máseleleri talqylanǵan jiyn ótti.
Onda sóz sóilegen Jandarbek Bekshin jemqorlyqqa qarsy kúres máselesin taqylai otyryp, ózine qarasty komitet mamandarynyń áleýmettik-turmystyq jaǵdaiy týraly sóz qozǵamai ketýge bolmaitynyn atap ótti.
«Bizdiń salada kóbinese buzýshylyqtar aýdandarda tirkelip jatady. Buǵan eń aldymen ailyqtyń tómen bolýy sebep bolyp otyr. Aýdandarda olar ortasha eseppen 65 myń teńge ailyq alady. Tipti jas mamandardyń ailyǵy budan da az. Aýylǵa diplommen keletin mamandarǵa kóterme aqy berý máselesi de sheshimin tapqan joq. «Diplommen aýylǵa» baǵdarlamasymen bizdiń mamandar qamtylmai qaldy», - deidi Jandarbek Bekshin.
Komitet tóraǵasynyń aitýynsha, Qoǵamdyq densaýlyq saqtaý komitetiniń qyzmetshileri aýdandyq deńgeige deiin jumys júrgizedi.
«Bizdiń balalardy balabaqshaǵa ornalastyrý máselesi de ózekti. Bul másele de sheshimin tapqan joq. Taǵy aitarym búgingi kúni baspana berý máselesi de ózekti kúiinde qalyp otyr. Sońǵy 10 jylda bizdiń memlekettik qyzmetshiler aimaqtyq deńgeide, naqtyraq aitqanda aýdandarda birde-bir baspana alǵan joq. Osyǵan bailanysty QR Memlekettik qyzmet isteri jáne sybailas jemqorlyqqa qarsy is-qimyl agenttiginen «B» korpýsyndaǵy memlekettik qyzmetshiler úshin qosymsha arnaiy quqyqtyq kepildendirý engizýdi suraimyz. Aýyldyq deńgeige deiin osy másele nazarǵa alynsa, jemqorlyqqa barý táýekeldiligi azaiar edi», - deidi Bekshin.
