QR Indýstriia jáne infraqurylymdyq damý ministrligi liftilerdiń otandyq óndirisin damytýǵa qoldaý jasap otyr.
Sala sarapshylary Qazaqstannyń 3,2 myńǵa deiin lift shyǵara alatynyna jáne lift jabdyǵyndaǵy negizgi qajettilikterdi óz betinshe jaba alatynyna senimdi, dep habarlaidy QazAqparat.
«Jyl saiyn Qazaqstan 5 myńnan astam lift importtaidy, al qoldanystaǵy otandyq óndiris tutynýshylyq suranystyń 21,4 paiyzyn ǵana jabady», - delingen ministrlik málimetinde.
Sarapshylardyń pikirinshe, naryqtyń jyldyq aýqymy 6920 lift. Bul-paidalaný merziminiń aiaqtalýyna bailanysty aýystyrýdy talap etetin jabdyqty esepke almaǵandaǵy kórsetkish. 2020 jyldyń sońyndaǵy aqparat boiynsha, elimizde osyndai liftilerdiń 5,7 myńy bar.
«Liftilerdi paidalanýdyń normativtik merzimi - 25 jyl. Minsiz jumys isteý úshin liftter ai saiyn qyzmet kórsetetin kompaniia mamandary tarapynan josparly tekserýden ótýi kerek. Jylyna bir ret tehnikalyq kýálandyrý júrgiziledi. Lift resýrsyn eń kóbi 2 jylǵa uzartýǵa bolady. Osydan keiin liftilerdi qaýipti tehnikalyq qurylǵy retinde jańa jabdyqqa aýystyrý nemese jańǵyrtý júrgizý qajet. Reglamenttiń saqtalýyn turǵyn úi ieleriniń birlestigi jáne turǵyndardyń ózderi qadaǵalap otyrýy kerek», - dedi Qazaqstan liftshileri ulttyq qaýymdastyǵynyń prezidenti Erjan Igibaev.
1 lifttiń ortasha quny 10 mln teńge bolsa, jańa turǵyn úi qurylysy boiynsha ǵana naryq aýqymy 70 mlrd teńgeni quraidy. Sonymen qatar, sarapshylardyń pikirinshe, lift jabdyqtaryna suranys jyl saiyn 10 paiyzǵa artyp keledi.
Bul qarajat elimizdiń ekonomikasynda qalýy úshin, jańa jumys oryndaryn qurýy jáne memlekettik qazynany tolyqtyrý baǵytynda Úkimet QR IIDM bastamasy boiynsha lift jabdyǵy óndirisin «Qarapaiym zattar ekonomikasy» baǵdarlamasyna engizdi. Osy oraida óndirýshilerge eleýli preferentsiialar alýǵa múmkindik beredi.
Elimizde lift jabdyqtaryn shyǵaratyn 3 iri kásiporyn jumys isteidi: «AUXE» Aqmola lift qurylysy zaýyty, «LGS KAZAKHSTAN ELEVATOR CROUP» JShS jáne «Almatylift» JShS. Alaida, sheteldik óndirýshilerdiń transferttik tehnologiialarymen kepildendirilgen jabdyqtyń básekelestik baǵasy men sapasyna qaramastan, zaýyttardyń óndiristik qýaty tolyq júktelmegen.
Mamandardyń pikirinshe, salany memlekettik qoldaý otandyq óndiristi jylyna 3200 liftige deiin arttyrýǵa múmkindik beredi.
