Aqsý aýdanynyń tártip saqshylary sharýalardy ózderiniń maldaryn GPS arqyly baqylaýǵa shaqyrdy, dep habarlaidy «Ult aqparat» Almaty oblystyq politsiia departamentiniń baspasóz qyzmetine silteme jasap.
Qazirgi tańda damyǵan kásiptiń biri ol – mal sharýashylyǵy. Sol sebepti de, osy kásippen qatar soǵan qarsy jasalynatyn qylmysta beleń alýda.
Turǵyndardyń kóp bóligi maldaryn qaraýsyz jibere salady jáne túńgi ýaqyttarda óz maldaryn qoralamaidy, sol sebepti qaraýsyz júrgen mal urylardyń ońai oljasyna ainalýda.
Jalpy, urlyqtyń aldyn alý baǵytynda politseilermen birqatar is-sharalar qabyldanyp jatyr. Alaida, bul jetkiliksiz. Urlyqty túbegeili joiý úshin sharýa qojalyqtary men turǵyndar salǵyrttyq tanytpai, qyraǵy bolýy jáne saqtyq sharalaryn saqtanýy qajet.
«Qazirgi ýaqytta soǵym naýqany jaqyndap kele jatyr, onyń ústine mal eti qymbattap ósýde, mal ieleri ózderińizdiń maldaryńyzǵa saqtyqpen qarap, qaraýsyz qaldyrmaýǵa keńes beremiz, qaraýsyz júrgen mal urylarǵa quryq bergendei ońai olja bolatynyn esten shyǵarmańyzdar», – deidi tártip saqshylary.
Aita ketsek, Almaty oblysy Aqsý aýdanynyń politsiia qyzmetkerleri maldyń moinyna smart qurylǵy taǵý arqyly urlyqpen kúresýdiń jańa ádisterin bastaǵan bolatyn.
Aqsý APB politsiia qyzmetkerleri jergilikti turǵyndarǵa maldardy urlaýǵa jáne jaiylym kezinde janýarlardyń joǵalýyna jol bermeý úshin smart qurylǵy qoldanýǵa keńes beredi. Tájiribe kórsetkendei, bul maldy saqtaýdyń tiimdi ádisteriniń biri.
«Ózderińiz biletindei, mundai qylmystar kóp kezdesedi. Aýylsharýashylyǵy salasyndaǵy qylmystyq ahýaldy jaqsartý úshin, sondai-aq mal urlyǵyna bailanysty qylmystardyń aldyn alý maqsatynda mundai qural eń jaqsy qorǵanys bolady. Urylarǵa osyndai GPS baýy bar maldy tasý nemese urlaý qiyn bolady», – deidi Aqsý oblystyq politsiia basqarmasynyń bastyǵy, politsiia podpolkovnigi Dáýren Sákenov.
Onyń aitýynsha, maldy urlanǵan jaǵdaida onyń iesi elektrondy qurylǵy arqyly maldyń qaida ekenin jáne olardyń qai baǵytta qozǵalatynyn kóre alady.
Buǵan deiin Aýyl sharýashylyǵy ministrligi mal urlyǵy úshin jazanyń qatal bolýy, aýyl sharýashylyǵy maldaryn tirkeý, COVID-19 pandemiiasy 2020 jyly mal urlyǵy faktilerin eki esege azaitýǵa múmkindik berdi dep habarlaǵan bolatyn. Sońǵy jyldary mal urlaý faktileri barlyq oblystarda azaiyp keledi. 2015 jyly 8 myń qylmys tirkeldi, 2016 jyly – 7,3 myń (-8%), 2017 jyly – 6,4 myń (-13%), 2018 jyly – 5,6 myń (-12,4%), 2019 jyly – 4,7 myń (-15,2 %). Iaǵni, 2015 jyldan 2019 jylǵa deiin tirkelgen jaǵdailardyń sany 40% -ǵa azaiǵan.
Sonymen qatar mamandar jazanyń qatal bolýy mal ósirýshilerdi mal urlyǵynan qutqarmaidy deidi.
