«Air Asia» malaiziialyq áýe kompaniiasy Qazaqstanǵa jańa reister ashýdy kózdep otyr, dep habarlaidy QazAqparat tilshisi QR IIDM Azamattyq aviatsiia komitetine silteme jasap.
QR Prezidentiniń tapsyrmasymen QR Indýstriia jáne infraqurylymdyq damý ministrligi jańa halyqaralyq baǵyttardy ashý jáne jańa sheteldik áýe kompaniialaryn tartý boiynsha belsendi jumys júrgizip jatyr. Osy tapsyrma negizinde Kýala-Lýmpýr qalasynda (Malaiziia) QR IIDM Azamattyq aviatsiia komiteti, QR-nyń Malaiziiadaǵy elshiligi, Nur-Sultan, Almaty, Qaraǵandy qalalary áýejailary men «Eir Astana» áýe kompaniiasy ókilderi bar qazaqstandyq delegatsiia Air Asia kompaniiasynyń ókilderimen kezdesken. Malaiziia tarapynan «Air Asia» kompaniiasynyń negizin qalaýshy Datýk Kamarýdin bin Meranýn jáne AirAsia áýe kompaniiasynyń atqarýshy direktory Beniamin Ismail kelissóz júrgizdi.
Air Asia - Aziiadaǵy iri jáne álemdegi 13-shi biýdjettik áýe kompaniia.
«Kelissóz barysynda taraptar Qazaqstan men Malaiziia arasynda «Air Asia» áýe kompaniiasynyń tikelei áýe qatynasyn ashý múmkindigin talqylady. Malaiziia tarapyna álemdik iri qarjy ortalyqtaryna Qazaqstan arqyly 5-shi áýe erkindigi bar Nur-Sultan, Almaty, Qaraǵandy áýejailaryna ushý múmkindigi usynyldy. «Ashyq aspan» rejimi Nur-Sultan, Almaty, Qaraǵandy, Shymkent, Óskemen, Pavlodar, Kókshetaý, Taraz, Petropavl, Semei qalalarynyń áýejailaryna taralady», - dep habarlaidy komitetten.
Sonymen qatar, otandyq áýejailar ókilderi turaqty reisterdiń ashylýyn yntalandyratyn túrli tetikterdi usyndy. Óz kezeginde Datýk Kamarýdin bin Meranýn Eýropanyń Rim, Milan, Nitstsa qalalaryna jáne Niý-Iork qalalary boiynsha áýe erkindigi bar Almaty qalasyna tikelei reis ashýǵa qyzyǵýshylyq bildirdi.
Sondai-aq, Malaiziianyń Kólik ministrligi Azamattyq aviatsiia departamentiniń basshysy - memlekettik hatshy Mohamad Radzýan Mazlanmen kezdesý ótti. Kelissóz barysynda malaiziialyq áýe kompaniialarymen, sonyń ishinde Air Asia-men áýe qatynasyn keńeitý máseleleri talqylandy.
Malaiziianyń aviatsiia biligi Qazaqstannyń eki el arasynda jańa reisterdi ashý jónindegi bastamasyna tolyq qoldaý bildirdi.
