Jyl basynan beri mal urlyǵymen ainalysqan 112 qylmystyq top ustaldy. Bul jaiynda QR IIM resmi ókili Nurdildá Oraz málim etti, dep habarlaidy QazAqparat.
«Qylmystyq kodekske múlkin tárkilep, 12 jylǵa deiin bas bostandyǵynan aiyrý túrindegi eń joǵarǵy jazany kózdeitin «mal urlyǵy» jeke baby engizildi. Osy bap negizinde úi-jailarǵa kirip mal urlaityndarǵa jaza kúsheitildi. Sondai-aq bul bap urylardyń jábirlenýshilermen tatýlasý arqyly jaýapkershilikten jaltarýyna jol bermeýge jáne urlyqtyń aldyn alýdy kúsheitýge múmkindik berdi», - dedi resmi ókil IIM baspasóz alańynda ótken brifingte.
Onyń atap ótýinshe, mal urlyǵynyń toptyq túrimen kúresý úshin óńirlerde jedel-izdestirý toptary jumys isteidi. Olar mal bazarlary men mal soiý oryndarynda arnaiy reidter júrgizedi.
«Jyl basynan beri politsiia 800-den astam mal urlyǵyn, onyń ishinde 112 qylmystyq topty ustady. Urlanǵan 7 myń maldyń 4 myńǵa jýyǵy tabylyp, qaitaryldy»,- dedi Nurdildá Oraz.
