Kriminaldyq politsiia departamentiniń bastyǵy, politsiia polkovnigi Dýman Taev mal urlyǵyn azaitý boiynsha atqarylǵan jumystardy baiandady, dep habarlaidy QazAqparat.
«Ministrliktiń bastamasymen qylmystyq zańnamaǵa «Qylmysty birneshe ret jasaǵany úshin» jáne «Úi-jaiǵa zańsyz kirgeni úshin» qylmystyq jaýapty kúsheitý boiynsha ózgerister engizildi. Atalǵan belgilerdi aýyr qylmys qataryna aýystyrý arqyly kúdiktiler ymyraǵa kelý jolymen jazadan sytylyp kete almaidy, bul urlyq sanyn 51,6%-ǵa (108 718-den 52 602-ge deiin) tómendetýge múmkindik berdi», - dedi D. Taev ministrdik uiymdastyrǵan onlain brifingte.
Onyń aitýynsha, mal sharýashylyǵy adamdardyń ómiri men respýblika ekonomikasynda basym baǵyttardyń biri jáne aýyl halqy úshin eń basty qyzmet túri bolyp otyr.
Osyǵan bailanysty, mal urlyǵy eldegi eń jii jasalatyn qylmys sanalady.
«IIM bastamasymen biyl aqpan aiynan bastap Qylmystyq kodekske 188-1 «Mal urlyǵy» baby engizilgenin atap ótken jón. Onda 12 jylǵa deiin bas bostandyǵynan aiyrý jáne múlkin tárkileý túrindegi eń joǵarǵy jaza kózdelgen. Bul baptyń urlyqtan basty aiyrmashylyǵy – qatań jaýapkershilik. Máselen jyl basynan beri mal urlyǵy úshin 350 kúdikti adam ustalyp, qamaýǵa alyndy, bul rette 77% (270) qatysty «Qamaýda ustaý» bultartpaý sharasy tańdaldy. Buryn bul kórsetkish 30% paiyzdan aspaityn», - deidi departament basshysy.
