QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda mal sharýashylyǵyn damytý máseleleri qaraldy, dep habarlaidy "Ult aqparat" primeminister.kz saityna silteme jasap.
Aýyl sharýashylyǵy ministri Saparhan Omarov, Pavlodar oblysynyń ákimi Ábilqaiyr Sqaqov, Qaraǵandy oblysynyń ákimi Jeńis Qasymbek, sondai-aq agrobiznes ókilderi baiandama jasady.
Mal sharýashylyǵynda 4% deńgeiinde turaqty ósim saqtalýda. Osy jyldyń sońyna deiin salanyń jalpy óniminiń kólemin 2,6 trln teńgege deiin, iri qara mal basyn – 7,8 mln basqa deiin, usaq mal basyn – 17,5 mln basqa deiin jetkizý josparlanǵan. 9 broiler qus fabrikasy salynady, olar qosymsha 105 myń tonna qus etin óndiretin bolady. Sonymen qatar jumys istep turǵan qus fabrikalarynda óndiristi ulǵaitý kózdelgen. Elimizdiń qajettiligin tolyq qamtamasyz etýge basymdyq beriledi. Jyl saiyn 25 sút-taýar fermasyn salý 2025 jylǵa qarai qaita óńdelgen sútti 500 myń tonnaǵa ulǵaitý esebinen ózin-ózi tolyq qamtamasyz etýge kóshýge múmkindik beredi.
Qazirgi ýaqytta mal sharýashylyǵy ónimderin qaita óńdeý salasynda josparlanǵan jáne iske asyrylyp jatqan investitsiialyq jobalardyń kólemi 717 mlrd teńgeden asady.
«Úkimet mal sharýashylyǵy ónimderiniń jetkilikti bolýyna jáne eksportty ulǵaitýǵa basa nazar aýdaratyn bolady. Iri óńdeýshi kásiporyndardyń ainalasynda, onyń ishinde jergilikti óndirýshilerge eksporttyq protseske qatysýǵa múmkindik beretin transulttyq kompaniialar men investorlardyń qatysýymen zákirli kooperatsiia erekshe basymdyqta bolýy tiis», — dedi A. Mamin.
Úkimet basshysy sátti mysal retinde Túrkistan oblysyndaǵy túie sútin óńdeý zaýytyn keltirdi. Investordyń shikizatty tartymdy baǵamen satyp alýynyń arqasynda sútke suranys artyp, túie sharýashylyǵy qarqyndy dami bastady. Bir túieniń quny el boiynsha 2 esege ósti. Sala asa tartymdy bola bastady.
Premer-Ministr Aýyl sharýashylyǵy ministrligine osy baǵyttaǵy úilestirý jumystaryn kúsheitýdi tapsyra otyryp, mal sharýashylyǵynyń basqa salalarynda da osyndai kooperatsiiany damytý qajet ekenin atap ótti.
A. Mamin usaq qara mal basyn kóbeitýge erekshe nazar aýdarýdyń qajettigin, otandyq qus sharýashylyǵyn odan ári keńeitýdiń jáne iri qara mal basyn arttyrý boiynsha júieli jumystyń mańyzdylyǵyn atap ótti.
Budan ózge, Úkimet basshysy búginde astyq egetin 300 iri jáne ortasha sharýashylyqtardy mal sharýashylyǵyna tartýǵa múmkindiktiń bar ekenine, munyń ózi salany damytýǵa qosymsha serpin beretinine toqtaldy.
Syrtqy naryqtarda aitarlyqtai suranysqa ie shoshqa etin óndirý — mal sharýashylyǵy ónimderiniń eksportyn ulǵaitýdaǵy perspektivaly baǵyt retinde ataldy.
«Jalpy, mal sharýashylyǵy salasy turaqty damyp keledi. Memleket barlyq qoldaý sharalaryn kórsetip jatyr», — dep A. Mamin, barlyq alǵa qoiylǵan mindetterdi júzege asyrýdy tapsyrdy.
