Aýyl sharýashylyǵy ministri Saparhan Omarov esep berý kezdesýinde mal sharýashylyǵy salasyndaǵy 2018 jyldyń nátijelerin atap ótti, dep habarlaidy "Ult aqparat".
Ol 2018 jyly «Sybaǵa» arqyly 6 aida 600 astam otbasylyq et fermasy kredit alyp, baǵdarlamaǵa qosylǵanyn aitty. Nátijesinde 2018 jyly et eksporty 18,7 myń tonnany, onyń ishinde siyr etiniń eksporty 4,7 myń tonnany quraǵan.
«Sútti mal sharýashylyǵyn damytý maqsatynda byltyr 25 taýarlyq sút fermasy paidalanýǵa berildi. Jalpy qýaty 6 myń bastan asatyn bul fermalardyń 7 – ónerkásiptik, 18 – otbasylyq fermalar. Tek uiymdastyrylǵan sharýashylyqtardaǵy sút óndirý kóleminiń ózi 1,5 mln tonnany qurady», - dedi Omarov.
Ministr qus sharýashylyǵynda 5,6 mlrd dana taýyq jumyrtqasy óndirilip, 671 mln dana jumyrtqa eksporttalǵanyn aitty. Bul kórsetkish 2017 jylmen salystyrǵanda 2 esege artyq.
«191 myń tonna qus eti óndirildi. Aqmola oblysynda qýaty jylyna 25 myń tonnany quraityn eń úlken broilerlik qus fabrikasy iske qosyldy. 2018 jyly mal sharýashylyǵy ónimderiniń kólemi 2 trln teńgeni qurady», - dep aitty vedomstvo basshysy esep berý kezdesýinde.
Sondai-aq, onyń aitýynsha aýyl sharýashylyǵy ónimderin shet elderge eksporttaý kólemi artyp keledi.
"Búginde 13 taýar túri boiynsha Qytai naryǵy ashyq. Iaǵni, balyq ónimderi, asyl tuqymdy jylqylar, muzdatylǵan qoi eti, bal, bidai, bidai kebegi, soia burshaqtary, soiys jylqylary, raps, siyr eti, jońyshqa pisheni, un, ósimdik maiy, arpa, júgeri eksporttalady", - dedi ministr Qazmedia ortalyǵynda halyqqa esep berý kezdesýinde.
l Iran tarapymen tiri qoilardy, muzdatylǵan jáne salqyndatylǵan qoi etin, siyr etin, jumyrtqa jetkizýge arnalǵan veterinariialyq talaptar kelisilgen.
"Saýd Arabiiasy Koroldigimen soiý jáne ósirý úshin otandyq iri qara mal men usaq mal eksporttaýǵa arnalǵan veterinariialyq sertifikat kelisildi. Bahreinge siyr eti men qoi etin eksporttaý júzege asyrylýda. Nátijesinde agroónerkásiptik keshen ónimderin Qytaiǵa eksporttaý 30,4%-ǵa (jalpy eksport - 258,2 mln AQSh dollary), Parsy shyǵanaǵy elderine (Katar, Kýveit, BAÁ, SAK, Oman, Bahrein) eksporttaý 4,1 esege, Iranǵa eksporttaý 2,1 esege (328,9 mln AQSh dollary), Eýroodaqqa eksporttaý 14,6%-ǵa (303,6 mln AQSh dollary) artty", - deidi ministr.
Jalpy agroónerkásiptik keshen ónimderin eksporttaý kólemi 2018 jyly 24,5%-ǵa ulǵaiǵan.
"Agroónerkásiptik keshen ónimderiniń sheteldik naryqtarǵa qoljetimdiligin arttyrý úshin Izrail, Túrkiia, Kýveit, Oman, Japoniia, Ońtústik Koreia memleketterimen, Eýroodaq elderimen kelissózder júrgizý josparlanyp otyr. Bul rette, Qytai tarapymen 2018 jyly Qazaqstannan jetkiziletin eksportqa baǵdarlanǵan aýyl sharýashylyǵy ónimderine qoiylatyn importtyq talaptardy kelisý jónindegi jol kartasy bekitildi", - dep sózin túiindedi S. Omarov.
