Atyraý oblysy Isatai aýdany Janbai aýylynyń turǵyndary taza, sapaly aýyz sýǵa zárý. Halyq alty aidan beri krannan aqqan sary sýdyń zardabyn shegip kelemiz deidi.
KAZ.NUR.KZ aqparatynsha, Janbai aýylynyń turǵyndary 5 litrlik sýdy bótelkelep satyp alýdan sharshaǵan. Ortalyq qubyrmen kelip turǵan sýdy tot basqan, ishý túgil baqshaǵa da paidalana almai otyrǵandaryn aitady. Las sýǵa ne úshin aqsha tóleýimiz qajet deidi halyq.
"Mine, alty ai boldy. Kúnde sap-sary sý aǵady. Bul sýdy mal da ishpeidi, aǵashty da sýara almaisyń. Keide durys sý aqqan kezde shelektep jinap alamyz. Biraq kóbine satyp alýǵa týra keledi. Men kópbalaly anamyn, nemerelerim bar, úide úlken kisi baǵyp otyrmyn. Tirshilik nárine zárý bolyp qaldyq. Mamandar kelip jasap ketedi, biraq nátije joq, qaita bastalady", - deidi Janbai aýylynyń turǵyny Liza Qabesova.
Janbai aýylynda 3500-diń ústinde úi bar. 2016 jyly "Aqbulaq" baǵdarlamasymen barlyq úilerge sý kelgen. Janbai aýyldyq okrýgi ákimi Didar Esmuhanovtyń aitýynsha, aýyldyń 4 kóshesinde ǵana aýyz sý máselesi sheshilmei keledi.
"Biz óz tarapymyzdyn "Atyraý sý arnasy" mekemesine qubyrlardy tazalaý nemese aýystyrý boiynsha usynysymyzdy berdik. Qazir jumysshylar jóndep jatyr. Turǵyndar da óz shaǵymyn árdaiym mekemege tikelei habarlasyp, aityp otyrady. Árine, halyq aqshasyn tólep otyrǵannan keiin sýdyń taza bolǵanyn qalaidy. Ákimdik janynan da qadaǵalaý júrgizip otyrmyz", - deidi okrýg ákimi.
Janbai aýylyndaǵy másele boiynsha "Atyraý oblystyq sý arnasy" mekemesi de jaýap berdi.
"Isatai aýdany turǵyndary "Magistraldyq Sýaǵyzǵy" JShS-nen sý alyp otyr. Mekeme 2021 jyldan bastap 150 shaqyrym bolatyn magistraldyq jeliniń qurylysyn bastady. Jańa qubyr Qurmanǵazy aýdanynan Isatai aýdanyna deiin salyndy. Osy jyldyń mamyrynda qubyr iske qosylǵan kezde sary sýdy qabyldai bastadyq. Sol kezde Janbai aýylynyń liniiasy lastanyp ketken bolýy yqtimal. Aýyl chattarynda kelgen shaǵymdar boiynsha tekseris júrgizip, 1-2 kún týrasynda qubyr boiyna dezinfektsiia jasap, órt sóndirý gidranttary arqyly syrtqa aidadyq. Qazir másele baqylaýda", - dep jaýap berdi tilshi saýalyna "Atyraý oblystyq sý arnasy" mekemesi baspasóz qyzmetiniń ókili.
