اتىراۋ وبلىسى يساتاي اۋدانى جانباي اۋىلىنىڭ تۇرعىندارى تازا, ساپالى اۋىز سۋعا زەرۋ. حالىق التى ايدان بەرٸ كراننان اققان سارى سۋدىڭ زاردابىن شەگٸپ كەلەمٸز دەيدٸ.
KAZ.NUR.KZ اقپاراتىنشا, جانباي اۋىلىنىڭ تۇرعىندارى 5 ليترلٸك سۋدى بٶتەلكەلەپ ساتىپ الۋدان شارشاعان. ورتالىق قۇبىرمەن كەلٸپ تۇرعان سۋدى توت باسقان, ٸشۋ تٷگٸل باقشاعا دا پايدالانا الماي وتىرعاندارىن ايتادى. لاس سۋعا نە ٷشٸن اقشا تٶلەۋٸمٸز قاجەت دەيدٸ حالىق.
"مٸنە, التى اي بولدى. كٷندە ساپ-سارى سۋ اعادى. بۇل سۋدى مال دا ٸشپەيدٸ, اعاشتى دا سۋارا المايسىڭ. كەيدە دۇرىس سۋ اققان كەزدە شەلەكتەپ جيناپ الامىز. بٸراق كٶبٸنە ساتىپ الۋعا تۋرا كەلەدٸ. مەن كٶپبالالى انامىن, نەمەرەلەرٸم بار, ٷيدە ٷلكەن كٸسٸ باعىپ وتىرمىن. تٸرشٸلٸك نەرٸنە زەرۋ بولىپ قالدىق. ماماندار كەلٸپ جاساپ كەتەدٸ, بٸراق نەتيجە جوق, قايتا باستالادى", - دەيدٸ جانباي اۋىلىنىڭ تۇرعىنى ليزا قابەسوۆا.
جانباي اۋىلىندا 3500-دٸڭ ٷستٸندە ٷي بار. 2016 جىلى "اقبۇلاق" باعدارلاماسىمەن بارلىق ٷيلەرگە سۋ كەلگەن. جانباي اۋىلدىق وكرۋگٸ ەكٸمٸ ديدار ەسمۇحانوۆتىڭ ايتۋىنشا, اۋىلدىڭ 4 كٶشەسٸندە عانا اۋىز سۋ مەسەلەسٸ شەشٸلمەي كەلەدٸ.
"بٸز ٶز تاراپىمىزدىن "اتىراۋ سۋ ارناسى" مەكەمەسٸنە قۇبىرلاردى تازالاۋ نەمەسە اۋىستىرۋ بويىنشا ۇسىنىسىمىزدى بەردٸك. قازٸر جۇمىسشىلار جٶندەپ جاتىر. تۇرعىندار دا ٶز شاعىمىن ەردايىم مەكەمەگە تٸكەلەي حابارلاسىپ, ايتىپ وتىرادى. ەرينە, حالىق اقشاسىن تٶلەپ وتىرعاننان كەيٸن سۋدىڭ تازا بولعانىن قالايدى. ەكٸمدٸك جانىنان دا قاداعالاۋ جٷرگٸزٸپ وتىرمىز", - دەيدٸ وكرۋگ ەكٸمٸ.
جانباي اۋىلىنداعى مەسەلە بويىنشا "اتىراۋ وبلىستىق سۋ ارناسى" مەكەمەسٸ دە جاۋاپ بەردٸ.
"يساتاي اۋدانى تۇرعىندارى "ماگيسترالدىق سۋاعىزعى" جشس-نەن سۋ الىپ وتىر. مەكەمە 2021 جىلدان باستاپ 150 شاقىرىم بولاتىن ماگيسترالدىق جەلٸنٸڭ قۇرىلىسىن باستادى. جاڭا قۇبىر قۇرمانعازى اۋدانىنان يساتاي اۋدانىنا دەيٸن سالىندى. وسى جىلدىڭ مامىرىندا قۇبىر ٸسكە قوسىلعان كەزدە سارى سۋدى قابىلداي باستادىق. سول كەزدە جانباي اۋىلىنىڭ لينيياسى لاستانىپ كەتكەن بولۋى ىقتيمال. اۋىل چاتتارىندا كەلگەن شاعىمدار بويىنشا تەكسەرٸس جٷرگٸزٸپ, 1-2 كٷن تۋراسىندا قۇبىر بويىنا دەزينفەكتسييا جاساپ, ٶرت سٶندٸرۋ گيدرانتتارى ارقىلى سىرتقا ايدادىق. قازٸر مەسەلە باقىلاۋدا", - دەپ جاۋاپ بەردٸ تٸلشٸ ساۋالىنا "اتىراۋ وبلىستىق سۋ ارناسى" مەكەمەسٸ باسپاسٶز قىزمەتٸنٸڭ ٶكٸلٸ.
