قازاقستاندا ازاماتتارعا پروفيلاكتيكالىق تەكسەرۋدەن ٶتۋ جەنە ۆاكتسيناتسييا تۋرالى اقپارات بەرۋ ٷشٸن جاڭا تسيفرلىق سەرۆيستەر ٸسكە قوسىلادى. 19 قازاننان باستاپ ٷش ٶڭٸردە سكرينينگ تۋرالى SMS-حابارلاما جٸبەرۋ جوباسى باستالادى, دەپ حابارلايدى ult.kz.
دەنساۋلىق ساقتاۋ مينيسترلٸگٸنٸڭ مەلٸمەتٸنشە, 19 قازاننان باستاپ اقمولا, اباي جەنە ۇلىتاۋ وبلىستارىنىڭ تۇرعىندارىنا 1414 نٶمٸرٸ ارقىلى سكرينينگتەن ٶتۋ قاجەتتٸگٸ تۋرالى SMS جٸبەرٸلەدٸ.
جٷيە جٷرەك-قانتامىر جەنە ونكولوگييالىق اۋرۋلاردى, قانت ديابەتٸن, مي قاناينالىمىنىڭ بۇزىلۋىن جەنە ۆيرۋستىق گەپاتيتتەردٸ ەرتە انىقتاۋعا ارنالعان التى باعىت بويىنشا تەكسەرۋدەن ٶتۋٸ قاجەت ازاماتتاردى اۆتوماتتى تٷردە انىقتايدى. حابارلاما العان تۇرعىن ٶزٸ تٸركەلگەن ەمحاناعا جٷگٸنە الادى.
ەكپە تۋرالى دا SMS كەلەدٸ
26 قازاننان باستاپ ەلٸمٸزدٸڭ بارلىق ٶڭٸرٸندە ازاماتتارعا جٷرگٸزٸلگەن ەكپەلەر تۋرالى SMS-حابارلاما جٸبەرۋ جوسپارلانىپ وتىر. ۆاكتسينا مەديتسينالىق اقپاراتتىق جٷيەگە تٸركەلگەننەن كەيٸن ازاماتقا نەمەسە بالانىڭ زاڭدى ٶكٸلٸنە ەكپەنٸڭ تٷرٸ مەن ەگٸلگەن كٷنٸ كٶرسەتٸلگەن حابارلاما كەلەدٸ.
ەگەر حابارلاماداعى اقپارات شىندىققا سەيكەس كەلمەسە, ازامات 1414 نٶمٸرٸنە جاۋاپ حابارلاما جٸبەرٸپ, بۇل تۋرالى حابارلاي الادى. مەلٸمەتتەردٸ تەكسەرۋ ٷشٸن سانيتارييالىق-ەپيدەميولوگييالىق باقىلاۋ كوميتەتٸنە جولدايدى.
مەديتسينالىق قىزمەتتەر دە تسيفرلىق باقىلاۋعا الىنادى
دەنساۋلىق ساقتاۋ مينيسترلٸگٸ مەديتسينالىق قىزمەتتٸڭ كٶرسەتٸلگەنٸن راستاۋعا ارنالعان تسيفرلىق سەيكەستەندٸرۋ جٷيەسٸن دە كەڭەيتٸپ جاتىر.
2026 جىلعى 7 قازانداعى مەلٸمەت بويىنشا, تٸركەلگەن 135,9 ملن مەديتسينالىق قابىلداۋدىڭ 73%-ى تسيفرلىق سەيكەستەندٸرۋدەن ٶتكەن.
قازٸر بۇل جٷيە مەديتسينالىق قىزمەتتٸڭ 1 278 تٷرٸن قامتيدى. ال 1 جەلتوقساننان باستاپ تٸزٸمگە كونسۋلتاتسييالاردىڭ, دياگنوستيكالىق زەرتتەۋلەر مەن مەديتسينالىق ەمشارالاردىڭ تاعى 736 تٷرٸن قوسۋ جوسپارلانىپ وتىر.
مينيسترلٸكتٸڭ مەلٸمەتٸنشە, جاڭا سەرۆيستەر پروفيلاكتيكالىق تەكسەرۋلەردٸڭ قولجەتٸمدٸلٸگٸن ارتتىرۋعا, پاتسيەنتتەردٸڭ قۇقىقتارىن قورعاۋعا جەنە مەديتسينالىق قىزمەتتەردٸڭ اشىقتىعىن قامتاماسىز ەتۋگە باعىتتالعان.
