Búgin Túrkistan oblysy, Maqtaaral aýdanyna Jetisý óńirinen ekinshi márte gýmanitarlyq kómek keldi. Jýyrda ǵana asa qomaqty kólemde gýmanitarlyq kómek joldap úlgergen jetisýlyqtar bul joly da jomarttyqtaryn tanyta bildi, dep habarlaidy "Ult aqparat".
Igi is «Nur Otan» partiiasy Almaty oblystyq filialynyń tóraǵasy, oblys ákimi A.Batalovtyń bastamasymen qolǵa alynǵan. Bastamaǵa partiianyń belsendi músheleri – halyq qalaýlylary, metsenattar atsalysyp, 80 tonnadai júk jiberip otyr. Onyń ishinde qurylysqa qajetti qyzyl kirpish, gazoblok pen qurǵaq qospalar bar. Jomarttyq jasaýshylar qatarynda depýtattar – J.Úshkempirov, D.Moldahalyqova jáne T.Botabekov bar. Kerýendi Maqtaaralǵa shyǵaryp salǵan «Nur Otan» partiiasy Almaty oblystyq filialy tóraǵasynyń birinshi orynbasary J.Jórgenbaev jetisýlyqtar Maqtaaralmen birge ekenin, gýmanitarlyq kómek ekinshi márte jóneltilip otyrǵanyn habarlady.
Aita keteiik, buǵan deiin mamyr aiynyń ortasynda Almaty oblysynan Myrzashólge 260 tonnadan astam gýmanitarlyq kómek kelgen bolatyn.
