Topan sý basqan Maqtaaral aýdanyna Almaty oblysynan 260 tonnalyq gýmanitarlyq kómek kelip jetti. 100 tonna azyq-túlik pen 160 tonna qurylys materialdary 15 júk kóligine tielgen, dep habarlaidy "Ult aqparat".
«Nur Otan» partiiasynyń «Biz birgemiz» aktsiiasy aiasynda jetkizilgen kómek kerýeninde azyq-túlik pen gigienalyq zattar, qurylys materialdary bar. Barlyq júkter oblystyq shtabtyń Atakenttegi ortalyqtandyrylǵan qoimasyna jetkizilgen. Al, qurylys materialdary Myrzakent kentindegi qurylys bazasyna túsirildi. Aita keteiik, kómek kerýenin Almaty oblystyq jastar isi jónindegi basqarma basshysy Jomart Qaratas pen «Nur Otan» partiiasynyń Almaty oblystyq filaly tóraǵasynyń birinshi orynbasary Janbolat Jórgenbaev bastap kelgen.
Jomart Qaratastyń aitýynsha, gýmanitarlyq kómekpen birge tasqyn bolǵan aimaqqa taldyqorǵandyq 20 erikti jas ta jetken. Olar aldaǵy ýaqytta Maqtaaral aýdanyndaǵy qurylys jumystaryna atsalysyp, túrkistandyq eriktilermen qoian-qoltyq eńbek etedi.
«Qazaq eli qashanda bir jeńnen qol, bir jaǵadan bas shyǵaryp, qiyn sátte birlikpen bir-birine demeý bola bilgen halyq. Elimiz osyndai syn saǵatty bastan keshirip jatqan shaqta Túrkistan oblysy Maqtaaral aýdanynda bolǵan apat barsha qazaqstandyqtardy alańdatyp otyrǵany belgili. Osy oraida Maqtaaral halqyna el bolyp qoldaý kórsetip, memleketimizdiń túkpir-túkpirinen kómekter toqtaýsyz kelip jatyr. Búgin bizde oblys ákimi Amandyq Batalovtyń bastamasymen Jetisý jurtshylyǵynyń amanatyn arqalap kelip otyrmyz. Bul kómek kerýenine kieli óńirimizdiń kásipkerleri men demeýshileri jáne eriktiler óz úlesterin qosty», - deidi Janbolat Jórgenbaev.
Jetisý jurtshylyǵy jibergen 260 tonna júktiń ishinde 18 tonna un men 7 tonna kúrish, 3 630 litr suiyq mai men 6 tonna makaron jáne basqa da azyq-túlikter bar. Sondai-aq, 6 myń sharshy metr qurylys aǵashy men 100 tonna tsement, 20 myń dana kirpish pen 90 qap qurylys qospasy, 15 tonna gipsokarton men 10 tonna qurǵaq qospasy bar.
