Maqtaaraldyqtar qiyn qystaý kezeńde qol ushyn bergen azamattarǵa alǵystaryn bildirdi. Evakýatsiia oryndarynda ornalasqan turǵyndar osyndai qaiyrymdylyqtan shet qalmaǵan memleket basshylyǵyna, úkimetke, oblys, aýdan basshylyqtaryna jáne barlyq qazaqstandyqtarǵa shynaiy alǵystaryn aitýda, dep habarlaidy "Ult aqparat".
Oblys ákimdiginiń málimetinshe, topan sýdan zardap shekken Jeńis, Jańaturmys, Ferdaýsi, Órgebas jáne Dostyq aýyldarynyń 6 myńnan asa turǵynyna jan-jaqty kómek kórsetilýde. Mektepter men kolledjderdegi, meshitterdegi 3 myńnan astam adamnyń búgingi jai-kúii birqalypty. Olardyń barlyǵy meditsinalyq tekseristen ótkizilip, jatyn orynmen jáne kórpe-tósekpen tegis qamtylǵan. Turǵyndarǵa kúnine úsh mezgil tamaq beriledi. Azyq-túlik pen jeke bas gigienasyn saqtaýǵa qajetti kerek-jaraqtyń bári jetkizilýde. Barlyq aýdandaryndan ákelinip jatqan kómek tótenshe jaǵdaiǵa bailanysty jasaqtalǵan ortalyq qoimada saqtalady. Óz kezeginde tolyqtai sý astynda qalǵan Firdoýsi aýylynyń turǵyndary úi-jai men mal-múlikteri jáne egistik alqaptarynyń shyǵyndary óteletindigin de estip, bir sergip qaldy.
«Shyǵyn óteledi, dedi oblys ákimi Ómirzaq Shókeev. Ony osynda turyp jatqan barlyǵymyz estip, kóńilimiz ornyna tústi. Úiimizdiń ornyna úi salynsa, egistikke jumsaǵan shyǵyndar ótelse, el riza. Kún jyly, kútemiz. Qasaqana jasalǵan is emes. Ony kózben kórip otyrǵan soń, kónemiz. Qurylys bastalsa, ózimiz basynda júremiz, dep qýanyp júrmiz. El aman bolsyn. Kómek jiberip jatqan barsha qazaqstandyqtarǵa myń alǵys aitamyz», - deidi Firdoýsi aýyly turǵynynyń biri Nadir Fahrýddin.
Aýyldardaǵy sý ketken soń, ár úige kelgen shyǵyn Arystaǵy tótenshe jaǵdai tájiribesi boiynsha esepteledi. Arnaiy komissiia úilerdi qalai qalpyna keltiretinin sheship, zardap shekken ár otbasyǵa ótemaqy tólenedi. Tipti egis alqaptary sýǵa ketken sharýalardyń shyǵyny da qaitarylady. Ázirge mal shyǵyny naqtylanýda.
«Bes balamyzdy súirep sol túni úidi tastap qashtyq. Mundaidy Alla eshkimniń basyna bermesin. Sózben jetkizý múmkin emes. Apattyń ádeii jasalmaǵanyn bilemiz. Aman qalǵanymyzǵa shúkir. Mektepte jatyrmyz. Tósek orny tap-taza, balalarǵa kiim-keshek berdi. Tamaq berip jatyr. Bárine rizamyz. Jasalǵan jaqsylyqtaryńyz úshin elime rizamyn»,- deidi Mahfirat Qurbanova.
Turǵyndardyń sý ortasyndaǵy mal-múlkin politseiler kúzetýde. Nurlyjol, Órgebas, Yrysty, Jantaqsai eldi mekenderinde tasqynǵa qarsy bóget salyndy, Firdoýsi eldi mekeniniń mańynda kollektor ornalastyrylǵan.
Aita keteiik, qazirgi tańda avariialyq – qutqarý jumystaryn júrgizý úshin 986 adam, 10 júzý qurylǵysy, 180 tehnika jumyldyrylǵan. Sonymen qatar, Qyzylorda, Jambyl oblystary men Shymkent qalasynan 30 ónimdiligi joǵary sý jinaǵysh soraptar kelgen. Qabyldaý evakýatsiialyq pýnkteri qajetti qural-jabdyqtar men azyq-túlikpen qamtamasyz etilgen. 120 meditsina qyzmetkeri meditsinalyq kómek kórsetýde. Kórshiles oblystar men oblystyń barlyq aýdandarynan, kásipkerler tarapynan túrli kómekter kórsetilip, qoldaý bildirilýde.
