Maqtaaral aýdanynda «Aqkerýen-2017» maqta teriminiń ashylý saltanaty ótti. Merekelik sharada «aq altynnyń» baǵasy anyqtalyp, maqtany qabyldaý beketteri alǵashqy ónimdi tonnasyn 165 myń teńgeden qabyldai bastady, - dep habarlaidy "Ult aqparat" Ońtústik Qazaqstan oblysy ákimdiginiń baspasóz qyzmetine silteme jasap.
Jerdi óńdeýdiń jańa ári tiimdi tásilin qoldanýdyń nátijesinde Maqtaaraldaǵy 95 myń gektar jerge sebilgen shitti maqtadan ortasha eseppen gektaryna 21-24 tsentnerden ónim alý kózdelip otyr. Búginde aýdandaǵy maqta qabyldaý beketterine 15 myń tonnadan astam aq altyn kelip túsken bolsa, diqandar terim bitkenshe 200 myń tonna aq ulpa jinap alýdy josparlaýda.
Biylǵy maqta kelisiniń baǵasy - 165 teńge. Básekelestik ortada maqtanyń baǵasy 200 teńgege deiin kóteriledi degen boljam bar.
Jalpy biyl Ońtústik Qazaqstanda 134,6 myń gektar jerge maqta shiti sebilgen. Bul ótken jylmen salystyrǵanda 25 myń gektarǵa artyq. 2016 jyly sharýalar ár gektaryna ortasha eseppen 26,2 tsentnerden ónim alyp, barlyǵy 286,4 myń tonna aq ulpa jinaǵan. Egis kóleminiń artýyna bailanysty óńirde 300 myń tonnadan astam maqta jinalady dep josparlanýda.
OQO Óńirlik kommýnikatsiialar qyzmetiniń uiymdastyrýymen ótken aqparattyq týr kezinde jýrnalister maqtaly aimaqtaǵy memlekettik baǵdarlamalardyń aiasynda kómek alyp, óndirisin keńeitip, aýdannyń áleýmettik-ekonomikalyq damýyna aitarlyqtai atsalysyp júrgen birqatar sharýashylyqtar men óndiris oshaqtaryn aralap, jumysymen tanysatyn bolady.
