Túrkistan oblysynyń Maqtaaral aýdanynda sý tasqynynan zardap shekken otbasylardyń balalary Jambyl oblysynda demalady. Bul týraly Jambyl oblysy ákimdiginde ótken jiynda aimaq basshysy Berdibek Saparbaev aitty, - dep habarlaidy "Ult aqparat".
Óńir ákimdiginiń aqparatyna súiensek, biyl jazǵy demalys lagerleri maýsymnyń ekinshi jartysynda jumysyn bastaidy. Osy oraida 8,5 myńnan astam bala PTR-test tapsyratyn bolady.
Atalǵan basqosýda baiandama jasaǵan oblystyq bilim Basqarmasynyń basshysy Gúlnár Hodjabergenova mektep janyndaǵy lagerlerdi ashpaýdy usyndy. Mektepte olardy ustaý úshin qarajattyń tapshylyǵymen qatar, balalardyń sanitarlyq normalardy saqtaýynda qosymsha problemalar týyndaýy múmkin.
«Oblysta bar-joǵy 11 balalar lageri bar. Bul - óte az. Jańa lagerler ashatyn bolamyz. Túrkistan oblysynyń Maqtaaral aýdanynda sý tasqynynan zardap shekken balalardyń demalysyn uiymdastyrýdy mindetti túrde qolǵa alamyz.
Bizdiń balalardy Qazaqstannyń basqa óńirlerine turaqty túrde demalýǵa jiberip otyrý kerek. Sonda olar óz qatarlastarymen aralasyp, elimizdi tereńirek tani túsedi», - dep atap ótti Berdibek Saparbaev.
Jiynda aimaqtaǵy 442 mekteptiń 5-eýi apattyq jaǵdaida ekendigi aityldy. Bul máseleni sheshý úshin ótken jyldan bastap Qordai aýdanynda bir jáne Shý aýdanynda eki mekteptiń qurylysy júrgizilýde.
Úsh aýysymdy toǵyz mekteptiń jai-kúii boiynsha 2021 jylǵa airyqsha basymdyq berilýde. Keler jyly birden mundai alty mekteptiń máselesi sheshiledi dep kútilýde. 41,5 myń mektep jihazdaryn aýystyrý úshin 749,3 mln. teńge qajet desek, Berdibek Saparbaev birinshi kezekte taqtalar men partalardy aýystyrýǵa kóńil bólýdi tapsyrdy. Mundai sharaǵa nysandardy salatyn kompaniialar da atsalysýy tiis.
«Qashyqtan oqytýdyń jańa túrlerin belsendi engizý qajet. Bul ásirese múgedek balalar úshin mańyzdy. Barlyq mektepterde Nazarbaev Ziiatkerlik mektepteriniń tájiribesin engizýi, óz túlekterimen bailanysty nyǵaitýy qajet. Jabdyqtalǵan dárethanalar men beinekameralardyń jiyntyǵy árbir mektepte bolýy kerek, bul Úkimettiń tapsyrmasy. Oqý oryndarynyń syrtqy kórinisin, qorshaýlaryn rettke keltirip, irgeles jatqan aýmaqty abattandyrýǵa den qoiǵan durys», - dedi oblys ákimi.
