Tehnogendi sipattaǵy tótenshe jaǵdai oryn alǵan Maqtaaral aýdanynyń turǵyndary qonys toiyn toilaýda. Apat aýmaǵynda qiraǵan úiler qalpyna keltirilip, Myrzakentte jańa shaǵynaýdan boi kóterdi, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
386 otbasyn qýanyshqa bólegen qonys toi saltanatty túrde atap ótildi. Qonys ieleriniń qýanyshymen bólisý úshin Maqtaaral aýdanyna arnaiy kelgen Premer-Ministrdiń orynbasary R.Skliar, Ózbekstan Respýblikasynyń sý sharýashylyǵy ministri Sh.Hamraev, Túrkistan oblysynyń ákimi Ó. Shókeev turǵyndardy quttyqtap, baspana kiltterin tabystady.
Alǵash bop sóz alǵan QR Premer-Ministriniń orynbasary, Tótenshe jaǵdai jónindegi respýblikalyq komissiianyń tóraǵasy Roman Skliar maqtaaraldyqtardy quttyqtap, igi tilegin jetkizdi.
Sonymen qatar, Maqtaaral aýdanynda oryn alǵan tótenshe jaǵdai kezinde erekshe qyzmet atqarǵan bir top azamattarǵa QR Premer-Ministriniń alǵys hattaryn tabys etti. Olardyń arasynda Ózbekstan Respýblikasynyń Sý sharýashylyǵy ministri Shavkat Hamraev pen Ózbekstan Respýbliasynyń Tótenshe jaǵdailar ministriniń birinshi orynbasary Abdýlla Kýldashov ta bar.
Jańa shaǵynaýdan turǵyndarynyń qýanyshyna ortaqtasqan oblys ákimi qiyndyqtyń artta qalǵanyn aityp, ár otbasy úshin baspanalarynyń berekeli bolýyn tiledi. Sondai-aq, óńir basshysy jańa móltekaýdannyń qurylysyna atsalysqan birqatar azamattarǵa QR Prezidentiniń alǵys hattary men «Halyq alǵysy» medalin tabystady.
«Sardoba sý qoimasyndaǵy bógettiń buzylýy shekaralas eki el úshin de ońaiǵa soqpady. Apat aityp kelmeidi. Osy tosyn jaǵdaidy estip, maqtaaraldyqtardyń taǵdyryna alańdaǵan Elbasy Nursultan Nazarbaevtyń qoldaýymen, QR Prezidenti Qasym-Jomart Toqaevtyń tapsyrmasymen Maqtaaralǵa memlekettik deńgeide qoldaý kórsetildi. Zardap shekken aýyldardyń árbir azamaty qamqorlyqsyz qalmady. Búkil el bolyp kómek qolyn sozdy. Qiyndyqtar artta qaldy, osy sát ómirlerińizdiń jarqyn kezeńi bolsyn. Jańa qonystaryńyz jaily da, berekeli bolýyna shyn júrekten tilektespin», – dedi Ómirzaq Estaiuly.
70 gektar jerde ornalasqan jańa qalashyqtaǵy 386 úige Jeńis, Jańaturmys jáne Dostyq eldi mekenderiniń turǵyndary kóship keletin bolady. Munda barlyq injenerlik infraqurylym tartylǵan. Aýyz sý, jaryq, jylý men káriz júiesi jasaqtalyp, joǵary jyldamdyqtaǵy internet jelisine qosylǵan. Sondai-aq jańa shaǵynaýdanda 1200 oryndyq mektep pen bala-baqsha jáne dárigerlik ambýlatoriia salynýda. Balalardyń oiyn alańdary ornatylyp, aǵashtar otyrǵyzylǵan. Jelilik saiabaq pen gúl baqtary móltekaýdannyń kórkine kórik qosyp tur.
Mamyr aiynda oryn alǵan apat kezinde 30 myńnan astam adam qaýipsiz jerge kóshirildi. Tilsiz jaýdan qutqarylǵan halyq Túrkistan oblysy ákiminiń tapsyrmasymen ashylǵan 24 evakýatsiialyq orynǵa ornalastyryldy. Maqtaaralǵa búkil el bolyp kómek qolyn sozdy.
Kórshi elden apat saldarymen kúresýge arnaiy tehnikalar men 200 adam keldi. Ózbekstandyq jasaq eldi mekenderge jaiylǵan sýdy tazalaý men sý sorý jumystaryn júrgizdi. Egistik alqaptardy qalpyna keltirip, shitti maqta etýge atsalysty.
«Nur Otan» partiiasy men basqa da qazaqstandyq kásipkerler apattan zardap shekkenderge qoldaý kórsetýde eleýli úles qosty. Elimizdiń túkpir-túkpirinen 700 tonnadan astam azyq-túlik pen gýmanitarlyq kómek keldi. Sý basqan aimaqtaǵy árbir turǵyn respýblika biýdjetinen 100 myń teńgeden qarajat aldy. «Bolat Ótemuratov qory» zardap shekkenderge úi salyp berý úshin 6 mln dollar bóldi.
Resei kásipkeri Álisher Ýsmanovtyń qorynan evakýatsiiaǵa ushyraǵan turǵyndar úshin 5,2 mln dollar aýdaryldy. Bul qarjy 5202 otbasyna (30 420 adam) 1000 dollardan úlestirildi.
Sardoba sý qoimasy bógetiniń buzylýynan zardap shekken úsh aýyl turǵyny úshin Myrzakentten jańa qalashyq boi kóterdi. 386 úidiń ishinde 196 turǵyn úi úkimet rezervinen bólengen qarajat esebinen, 150 úi Bolat Ótemuratov qorynyń qarjysyna salyndy. 40 baspana «Nur Otan» partiiasynyń «Biz birgemiz» qory men «Saliqaly urpaq» qorlarynyń qoldaýymen boi kóterdi.
«Bizdiń qorymyzdyń quryltaishysy Bolat Ótemuratov qazaqstandyq metsenattar ishinen alǵashqy bolyp kóktemde bolǵan apattan zardap shekkenderge kómek kórsetýdi sheshti. Ol 6 mln AQSh dollaryn bólip, olardy apat saldarynan baspanasyz qalǵan 150 otbasyna arnap úi salýǵa jumsady. Bul óńirdiń qaita qurylýyna eń qomaqty úles jáne salynǵan úilerdiń eń joǵary sany bop esepteledi. Jobany iske asyrý barysynda biz eń jaqsy materialdy tańdap, jumys sapasyn qatal qadaǵaladyq. Pandemiia men karantinge bailanysty qiyndyqtarǵa qaramastan, tórt aidyń ishinde jobany oryndadyq», – dedi Bolat Ótemuratov qorynyń direktory Marat Aitmaǵambetov.
Saltanatty shara sońy merekelik kontsertke ulasty. Turǵyndardyń qýanyshyn bólisken Premer-Ministrdiń orynbasary R. Skliar men oblys ákimi Ómirzaq Shókeev baspanaly bolǵan 2 otbasynyń shańyraǵyna kirip, qutty bolsyn aitty.
