Qazirgi tańda Maqtaaral aýdanynda oryn alǵan jaǵdaiǵa bailanysty 2243 azamat qaýipsiz aimaqqa kóshirildi. Sondai-aq, sýdan qaýip tóngen Nurlyjol men Fredaýsi aýyldarynan 415 úidiń 3200-den astam turǵyny qaýipsiz aimaqqa shyǵarylǵan. Búgin bul týraly Maqtaaral aýdanynyń ortalyǵy - Myrzakent kentinde ornalasqan oblystyq shtab jetekshisiniń orynbasary Sáken Qalqamanov onlain rejimde ótkizgen baspasóz máslihatynda málim etti, dep habarlaidy Túrkistan oblysy ákimdiginiń baspasóz qyzmeti.
Onyń aitýynsha, sý tasqyny aýdan boiynsha 4 eldimekenge qaýip tóndirgen. Bul degenimiz 4624 halqy bar 868 úi sý astynda qalýy múmkin degen sóz. Alaida, qazir der kezinde qolǵa alynǵan sharalardyń arqasynda qaýiptiń beti qaitqan. Tótenshe jaǵdaiǵa bailanysty 18evokýatsiialyq oryndar daiyndalyp, olar Atakent, Maqtaral, Jambyl eldimekenderinde ornalasqan. Apattan qutqarý jumystaryna 630 adam men 2 sý kóligi jáne 56 tehnika jumyldyrylǵan. Qazirgi tańda qaýipti aimaqtaǵy azamattar men úi janýarlaryn qaýipsiz jerge kóshirý sharalary uiymdastyrylady. Bul jumystarǵa Keles, Jetisai, Shardara, Saryaǵash aýdandarynyń ákimshilikteri atsalysatyn bolady.
Desek te, aýdanda sý basyp qalý qaýpi bar aýyldar da joq emes. Solardyń biri - Jańaaýyl aýyldyq okrýgine qarasty Ferdoýsi eldimekeni. Qazirgi tańda aýyl ortasyndaǵy «Ferdoýsi» jalpy orta mektebiniń aýmaǵyna sý kóterilgen. Sonymen qatar, 6 úidiń aýlasyna sý ketken. Eldimekenniń ishki kollektoryna sý tolǵan. Jeńis eldimekenine kiretin negizgi kópirdi sý shaiyp ketken. Kópirdiń uzyndyǵy 10 metr, eni 6 metrdi quraidy. Sondai-aq, Nurlyjol aýylyndaǵy 28 gektar maqtaly egistigin sý basqan.
Budan bólek, sý tasqyny kezinde Jańa jol men Eńbekshiaýyldyq okrýgterindegi 3 eldimekende 1682 gektar aýyl sharýashylyǵy daqyldary zardap shekeni anyqtaldy. Aldyn ala boljamdyq esep boiynsha 181,1 mln. teńgeniń shyǵyny eseptelip otyr. Atap aitqanda, 1480 gektar maqta 148 mln. teńgege, 42 gektar jońyshqa - 2,1 mln, 150 gektar baqsha - 30 mln, 10 gektar júgeri - 1 mln. teńgelik shyǵynǵa ushyrady dep boljanýda. Sondai-aq, atalǵan 4 eldimekende 5335 mal basy tirkelip, onyń ishinde 799 mal basy zardap shegip, 249 mln. shyǵynǵa usharady. Onyń 328-i iri qara, 361-i usaq mal, 53-i jylqy, 57-si túie.
Qazirgi tańda Maqtaraldan 46-y, Jetisaidan 10, Shardaradan 5, barlyǵy 61 veterinarlyq dárigerler Jantaqsai, Ferdoýsi eldimekenderindegi 3686 maldy evakýatsiialaý jumystaryn júrgizýde.
