Maqtaaral aýdanynda sý tasqynynan zardap shekken bes aýyldyń 5,3 myń turǵynyna 100 myń teńgelik qarjylai kómek berildi, dep habarlaidy "Ult aqparat" oblystyń Óńirlik kommýnikatsiialar qyzmetine silteme jasap.
Túrkistan oblysynyń Maqtaaral aýdanyndaǵy sý tasqynynan zardap shekken Jańaturmys, Jeńis, Firdaýsi, Dostyq, Órgebas eldimekenderiniń turǵyndaryna Úkimet tarapynan beriletin 100 myń teńgelik qarjylai kómekke 6 347 turǵyn qujat tapsyrǵan. Onyń 5 356-synyń ótinishi maquldanyp, esepshottaryna jalpy 535,6 mln teńge aýdaryldy. Bul týraly Túrkistan oblysy boiynsha Qazaqstan halqy assambleiasy tóraǵasynyń orynbasary Ǵani Rysbekov málimdedi.
Onyń aitýynsha, qalǵan 911 adamnyń qujaty tolyq bolmaýyna bailanysty tiisti kómekti almaǵan.
«Qazirgi tańda tótenshe jaǵdaidan zardap shekkenderge qarjylai kómek berilip jatyr. Anyqtaý jumysy kezinde 146 azamattyń qujaty tiisti ákimdiktiń tarapynan rastaldy. Al, 62 azamattyń qujaty qaitalansa, 4 adam basqa eldiń azamaty bolyp shyqqan. Sondai-aq, 779 azamattyń qujaty komissiianyń qaraýynan qaita ótetin bolady», - dedi Ǵani Rysbekov.
Budan bólek, topan sýdyń zardabyn kórgen 5 205 otbasyǵa kásipker Álisher Ýsmanovtyń qorynan árbir januiaǵa 1 000 AQSh dollary berilgen. Búginde dál osyndai kómek alýy tiis qosymsha 120 otbasy anyqtalyp otyr. Nátijesinde 5316 otbasynyń esepshotyna 2 206 724 760 teńge jiberildi.
Osy siiaqty qarjylai qoldaýǵa ie bolǵan jannyń biri Firdaýsi aýylynyń turǵyny Finaiat Faiziev. Ol qiyndyqqa tap bolǵan azamattarǵa kómek qolyn sozǵandarǵa alǵys aitty.
«Aýylymyzdy topan sý basqan kúnnen bastap, bizge ártúrli kómek kórsetilip keledi. Mysaly, úisiz qalǵan kezde túgel aýyldy ýaqytsha evakýatsiialyq ortalyqqa aparyp jaiǵastyrdy. Azyq-túlik, kiim-keshek, basqa da qajetti zattarmen qamtamasyz etti. Odan bólek, ákimdiktiń qoldaýymen aýyldy qoqystan tazartyp aldyq. Mine, búginde 17 mln teńgeniń 50 paiyzyn aýdaryp berdi. Sol qarjyǵa baspanamyzdy salyp jatyrmyz. Qalǵanyn úidiń shatyryn jaýyp bolǵan soń aýdaratyn boldy. Keibir qurylys materialdaryn tegin de jetkizip berip jatyr. Osyndai kómekke uiytqy bolyp otyrǵan Memleket basshysy men oblys ákimine jáne barsha halyqqa alǵys aitqymyz keledi», - dedi F.Faiziev.
