Myrzashól óńirin eń iri maqta ósiretin aimaqqa ainaldyrǵan «Dostyq» kanalynyń arnasynan biyl sý ketken joq. Bastaýyn Ózbekstannan alatyn kanaldan keletin sý buǵan deiin jaz ortasynda maqtaraldyq diqandarǵa jetpei, sharýalar shash etekten shyǵynǵa batyp, tókken terleri tekke ketetin. Maqtaaral aýdanynda 136 myń gektar sýarmaly jer bar. Biyl aq altyn alqabynyń kólemi birshama ulǵaitylyp 94 myń gektar jerge maqta egilgen. Aýdan ákimi Ǵ.Ismailov jyldyń basynda jýrnalisterge bergen brifingte "Maqtaaralda biyl sý tapshylyǵy bolmaidy!" dep málimdeme jasaǵan edi. Keiinnen óńirdegi kollektorlyq júielerdi tazalaý jumystary júrgizilip, tik drenajdy uńǵymalar jaraqtandyryldy. Sol jumystardyń arqasynda aýdannyń sý júieleri retke kelip, sý tapshylyǵy joiyldy. Sonymen qatar, sý máselesiniń sheshilýinde qazaq-ózbek qarym-qatynasynyń jandanýy da óz nátijesin berýde. Bul týraly Maqtaaral aýdany ákiminiń baspasóz qyzmeti habarlady.
«Jazdyń shilde-tamyz ailarynda sý tapshy bolyp, ózimizge tiisti sýymyzdy 50 paiyzǵa deiin ala almai júrgen jyldar boldy. Osy jumys qolǵa alynyp, birtalai is-sharalar jasalyndy. Sonyń nátijesin kórip otyrmyz. Qazir ózimizge tiisti sýdy tolyǵymen alyp jatyrmyz. Maqtaaralǵa «Dostyq» transshekaralyq kanalynan sekýndyna 100 tekshe metr sý túsip jatyr. Bekitilgen keste boiynsha 1 milliard 116 million tekshe metr tirshilik nári alynady. Bul sýarý maýsymyna jáne kóktemgi sordy shaiýǵa jetkilikti bolady» - deidi «Qazsýshar» RQM OQOF direktorynyń mindetin atqarýshy Tolqyn Balpikov.
Birneshe jyldan beri Ózbekstanmen sý máselesi jóninde kelisim júrgizgen QR AShM Sý resýrstary komitetiniń tóraǵasy Islam Ábishev «Dostyq» kanalynyń sýyn proportsionaldy túrde bólisýge keliskenin aityp otyr. Iaǵni, dál osy kanal arqyly kórshi aǵaiyndardyń 112 myń gektary, maqtaaraldyqtardyń 136 myń gektary sý ishedi. Tóraǵanyń aitýynsha, buǵan deiin ózbek tarapy ózderiniń gidrobeketterine jibermeitin. Qazirgi kelisim boiynsha kórshiles áriptestermen ózderiniń beketterine tekserý úshin, qadaǵalaý úshin jiberetin deńgeidegi ýaǵdalastyqqa qol jetkizilgen.
Byltyr Maqtaaral aýdanynyń 50 myń gektary sý tapshylyǵyn kórgen. Onyń kesirinen 40 myń tonnadan astam aq altyndy diqandar ala almai qalǵan. Al biyl bul másele múlde bolǵan joq.
«Sýdan eshqandai másele bolǵan joq. Maqtamyz tolyqtai birinshi sýyn iship bitti. Endi ekinshi sýdy ashyp jatyrmyz» - deidi 120 gektar alqapqa maqta daqylyn ekken sharýa qojalyǵynyń tóraǵasy Nurlan Aryzqulov.
