Parlament Májilisiniń jalpy otyrysynda Maqtaaral aýdanynda sý basqan turǵyn úilerge kelgen zalaldy baǵalaý júiesine qatysty usynystar aityldy. Osy oraida Úkimet basshysy Asqar Maminniń atyna depýtattyq saýal joldandy, dep habarlaidy "Ult aqparat".
«Barshańyzǵa belgili bolǵandai, Ózbekstannyń aýmaǵynda ornalasqan «Sardoba» sý qoimasy bógetiniń buzylýy saldarynan Maqtaaral aýdanynyń birqatar eldi mekenderi sý astynda qaldy. Búgingi tańda resmi derekter boiynsha aýdannyń 10 eldi mekeni, 800-den asa turǵyn úileri, 3 mektep, 5 balabaqsha, 4 meditsinalyq nysan sý astynda qalyp, 31 myńnan astam turǵyn evakýatsiialandy. Qazirdiń ózinde kóktem kezinde eńbegi janatyn diqan-fermerlerdiń 7600 gektarǵa jýyq aýmaqtaǵy daqyldy egin alqabyn sý basty. Memleket basshysy Qasym-Jomart Kemeluly Toqaev sý basqan aýyldardyń turǵyndaryna jan-jaqty materialdyq kómek kórsetý týraly Úkimetke tapsyrma berip, Túrkistan oblysynyń birde-bir turǵyny nazardan tys qalmaitynyn aitty. Prezident tapsyrmasyn oryndaýda Úkimet jedel sharalar qabyldady. Apattyń alǵashqy kúninen bastap óńirde jedel shtab quryldy», - dep toqtaldy depýtat Qudaibergen Erjan.
Osy oraida ol qabyldanyp otyrǵan sharalarǵa usynys aitty.
«Úkimettik komissiia sý alǵan turǵyn úilerge kelgen zalaldy baǵalaýda tek úidiń salynǵan materialyna ǵana emes, úidiń tekshe metr kólemi men turǵyndar sanyn negizge alýyn suraimyz. Keibir turǵyndardyń óz múlikterin rásimdep úlgermegenderi de bolady. Osy jaǵdaidy eskerý qajet. Jerasty sýlarynyń jaqyn ornalasqanyn eskere otyryp, sý basqan jerlerdi babyna keltirý maqsatynda drenaj júielerin qoldanýdy qajet dep sanaimyz. Diqandarǵa egindi qaita egýge qoldaý joldaryn qarastyra otyryp, onyń ishinde aýylsharýashylyq tehnika, janar-jaǵarmaimen jedel qamtamasyz etetin jáne olarǵa egistik alqaptarda ýaqytsha panalaýǵa múmkinshilik jasaý kerek. Sonymen birge, diqandarmen aqyldasa otyryp, qysqa merzimde ónim beretin daqyldardy egýdi jáne oǵan kerekti tuqymdardy jetkizip berýdi, keiinnen alynǵan ónimniń satylýyna bailanysty sharalardy iske asyrý kerek dep sanaimyz», - dedi depýtat.
Sonymen qatar ol qazirgi karantin jaǵdaiyn eskere kele, turǵyndarǵa meditsinalyq kómek berý máselesine asa joǵary mán berý kerektigin aitty.
