Maqtaaral aýdanynda topan sýdan shardap shekken úsh aýyldyń turǵyndaryna salynyp jatqan jańa móltek aýdannyń qurylysy qarqyndy. Munda qazirgi tańda 386 úidiń qurylysy júrgizilýde, dep habarlaidy "Ult aqparat".
Myrzakent aýylynda salynyp jatqan móltekaýdanda búginde 46 úide ishki árleý, 54-inde shatyr jabý, 239-ynda qabyrǵa qalaý jumystary júrgizilýde. Al, 77-sinde birinshi jappasyn jabý, 10-ynda irgetasyn qalaý jumystary jalǵasýda. Jańadan salynyp jatqan 386 úidiń 196-sy úkimettik rezervten, al 190-y qorlar esebinen boi kóterýde.
«Aldaǵy 1-shi shilde kúni 55 úidiń qurylysy tolyq aiaqtalyp, 100 úidiń shatyry jabylyp bitedi dep josparlap otyrmyz. Qurylys qarqyny bir sátke de báseńdep otyrǵan joq. Merdiger mekemeler eki kezeńde jumys isteýde. Iaǵni, kúndizgi jáne túngi aýysymda jumystaryn jalǵastyrýda. Ázirge qurylys materialdarynan nemese qurylysshylardan tapshylyq oryn alyp otyrǵan joq», - deidi Maqtaaral aýdandyq sáýlet, qala qurylysy jáne qurylys bóliminiń basshysy Bijan Anarbekov.
Jańa móltekaýdandaǵy 70 gektar aýmaqta turǵyn úi qurylysynan bólek, infraqurylymdyq iaǵni gaz, sý, jol, jaryq tartý jumystary qatar júrgizilýde. Sondai-aq, 1200 oryndyq mektep pen 280 oryndyq balabaqshanyń ornyn ázirleý jumystary jalǵasýda. Aita keteiik, jańa móltekaýdanda 31 merdiger kompaniia men onyń 1507 qurylysshysy eńbek etýde. Ózderine tiesili úilerdiń qurylysyn júrgizýde jetisailyq «Núri-L- Jetisai» qurylys kompaniiasy aldyńǵy qatarda keledi. Olar qazirdiń ózinde 9 úidiń ishki árleý jumystaryn bitirýge taiaý. Jalpy atalǵan kompaniia osyndaǵy 20 úidiń qurylysyn júrgizý quqyǵyn ielengen bolatyn. Búginde merdiger kompaniiada 110 qurylysshy men 20-ǵa tarta tehnika toqtaýsyz jumys isteýde.
