Túrkistan oblysynyń Maqtaaral aýdanynda jalpy 5 myń gektarǵa jýyq aýylsharýashylyǵy alqabyn sý basqan. Bul týraly aýdan ákimi Baqyt Asanov kezekti brifing barysynda málimdedi, dep habarlaidy "Ult aqparat".
Aýdan ákiminiń aitýynsha, sý basqan tórt eldimekende aýyl sharýashylyǵyna qanshalyqty shyǵyn kelgeni anyqtalýda.
«Aýdanda 4 eldimekende egistik daqyldary egilgen 3 myń gektardai jerdi sý basqan. Ol jerde maqta, jońyshqa, júgeri siiaqty daqyldar egilgen. Qazirgi tańda tótenshe jaǵdaidan aýylsharýashylyǵy salasyna keltirilgen shyǵyndar eseptelip jatyr», - deidi Baqyt Asanov.
Aýdan ákiminiń málimetinshe, Ózbekstan tarapy bógettiń buzylǵanyn der kezinde habarlap eskertpegen.
«Bizge Ózbekstannyń bilik ókilderi resmi túre habarlasyp, qalyptasqan jaǵdai týraly aitpady. Dambynyń buzylǵandyǵy jóninde áleýmettik jeliden bildik. Bastapqyda kanalǵan sekýndyna 120 tekshe metr sý kelse, keshke qarai sýdyń deńgeii 180 tekshe metrge deiin kóterilip ketti. Sosyn jaǵdaidy baqylaýǵa alyp, jan-jaqqa habarlastyq. Ózdigimizshe áreket jasai bastadyq», - deidi Baqyt Asanov.
Eske sala keteiik, keshe Ózbekstanda Sardoba sý qoimasynyń bógeti jarylyp , eldi mekender, kommýnikatsiialyq jeli, egistikke zaqym kelgen. Sonyń saldarynan Maqtaaral aýdanynyń eki aýylyn sý basty. Aýdanda 2 mamyrda túngi 00:00-de tótenshe jaǵdai jariialandy. Sý basqan aýyldardan 5 400 adam qaýipsiz jerge kóshirildi.
