Maqtaaral aýdanyndaǵy sý tasqynynan zardap shekken Firdoýsi men Órgebas eldi mekenderinde 504 turǵyn úidiń 494-niń qurylystary aiaqtalyp, 10 úi jaqyn arada paidalanýǵa beriledi.
Bul týraly Túrkistan oblysynyń ákimi Ómirzaq Shókeev brifing barysynda málim etti, dep habarlaidy "Ult aqparat".
Ómirzaq Estaiulynyń aitýynsha, Maqtaaral aýdanyndaǵy Jeńis, Jańaturmys, Dostyq eldi mekenderiniń turǵyndaryna, Myrzakent kentinde jańadan boi kótergen yqshamaýdanda 386 jeke turǵyn úidiń qurylysy tolyq aiaqtalyp, kiltteri úi ielerine tabystalǵan.
Onyń ishinde 196 turǵyn úi qurylysyna Úkimettik rezerv esebinen qarjy bólinse, qalǵan 190 turǵyn úidiń qurylysy qaiyrylymdyq jáne ózge de qorlar arqyly júrgizilgen.
«Budan bólek, Myrzakent kentindegi jańa móltek aýdanda 1200 oryndyq mektep pen 280 oryndyq balabaqsha, 1 dárigerlik ambýlatoriia jáne 1 politsiia beketiniń qurylysy júrip jatyr. Sondai-aq, Firdoýsi aýylynda 600 oryndyq mektep aǵymdaǵy jóndeýden ótse, 1 dárigerlik ambýlatoriia men 1 politsiia beketi, Órgebas aýylynda 1 feldsherlik-akýsherlik pýnkt pen 1 politsiialyq beketiniń qurylysy júrip jatyr. Joǵaryda atalǵan mektep pen balabaqsha kelesi jylǵa ótpeli bolsa, qalǵan nysandardyń qurylys jumystary aǵymdaǵy jyldyń jeltoqsan aiynda tolyq aiaqtalady dep josparlanýda. Atalǵan aýqymdy jumystardyń nátijesinde aýdandaǵy eldi mekender odan ári kórkeie tústi. Maqtaaral aýdanyndaǵy qazirgi jaǵdai turaqty», - dedi oblys ákimi.
