Tótenshe jaǵdai qalyptasqan Maqtaaral aýdanynyń ortalyǵynan bir túnde 12 myńdai adam kóshirilgen. Myrzakentke sarqyndy sýdan qaýip tóngendikten bilik osyndai qadamǵa baryp, turǵyndar túnimen Atakent kentine tasymaldandy, dep habarlaidy "Ult aqparat".
Oblys ákimdiginiń málimetinshe, halyqtyń kóshýin qamtamasyz etý maqsatynda 68 avtobýs bólingen. Atakenttegi oqshaýlaý oryndaryna jetkizilgen turǵyndarǵa qajetti kómek kórsetilýde. Eń aldymen oqshaýlaý oryndaryna barǵan turǵyndar esik aldyndaǵy meditsina mamandarynyń arnaiy blokpostyna birtindep tirkelip, koronavirýs indetin anyqtaý qurylǵysymen dene temperatýrasy tekseristen ótkizilgen. Sodan keiin ǵana oqshaýlaý oryndaryna jiberilgen.
Aita keteiik, keshe túske deiin Maqtaaral aýdanynda oryn alǵan jaǵdaiǵa bailanysty 2243 azamat qaýipsiz aimaqqa kóshirilse, tústen keiin sý basý qaýpi basym bolǵan Nurly jol men Ferdoýsi aýyldarynan 415 úidiń 3200-den astam turǵyny qaýipsiz aimaqqa shyǵaryldy. Al, túngi saǵat 23:00-de Myrzakent kentiniń turǵyndaryn kóshirý jumystary bastalyp ketti. Sebebi, sarqyndy sý Myrzakent kentiniń irgesine jaqyndap qalǵan bolatyn.
«Arnaiy shtab kelisimimen halyqty kóshirý týraly sheshim qabyldandy. Tótenshe jaǵdaiǵa bailanysty aýdanda 18 evakýatsiialyq oryndar naqtylanyp, olar Atakent, Maqtaral, Jambyl eldimekenderinde ázirlendi. Apattan qutqarý jumystaryna 630 adam men 2 sý kóligi jáne 56 tehnika jumyldyryldy. Qazirgi tańda qaýipti aimaqtaǵy azamattar men úi janýarlaryn qaýipsiz jerge kóshirý sharalary uiymdastyrylýda. Bul jumystarǵa Keles, Jetisai, Shardara, Saryaǵash aýdandarynyń ákimdikteri atsalysyp jatyr. Desek te, aýdanda sý basyp qalý qaýpi bar aýyldar da áli de az emes. Solardyń biri - Jańa aýyl aýyldyq okrýgine qarasty Ferdoýsi eldimekeni. Qazirgi tańda aýyl ortasyndaǵy «Ferdoýsi» jalpy orta mektebiniń aýmaǵyna sý kóterilgen» delingen habarlamada.
Budan bólek, zerdeleý, zertteý jumystarynyń nátijesinde sý tasqyny kezinde Jańa jol men Eńbekshi aýyldyq okrýgterindegi 3 eldimekende 1682 gektar aýyl sharýashylyǵy daqyldary zardap shekeni anyqtalyp otyr. Aldyn ala boljam boiynsha 181,1 mln teńgeniń shyǵyny eseptelgen.
Atap aitqanda, 1480 gektar maqta - 148 mln teńgege, 42 gektar jońyshqa - 2,1 mln, 150 gektar baqsha - 30 mln, 10 gektar júgeri - 1 mln teńgelik shyǵynǵa usharady dep boljanýda. Sondai-aq, atalǵan 4 eldimekende 5335 mal basy tirkelip, onyń ishinde 799 mal basy zardap shegip, 249 mln shyǵynǵa usharaǵan. Onyń 328-i - iri qara, 361-i - usaq mal, 53-i - jylqy, 57-si - túie. Maqtaaraldan - 46, Jetisaidan - 10, Shardaradan - 5, barlyǵy 61 veterinar dáriger Jantaqsai, Ferdoýsi eldi mekenderindegi 3686 maldy evakýatsiialaý jumystaryn tolyq aiaqtady.
Degenmen sý basyp qalǵan aimaqtarda qansha maldyń sýǵa ketkenin naqty anyqtaý ázirge múmkin bolmai otyr. Óitkeni sý basqan aimaqqa kirý múmkin emes.
Mamandardyń aitýynsha, buzylǵan dambadan kelip jatqan qashyrtpa sýdyń kólemi azaimaýda. Sol sebepti tótenshe jaǵdai salasynyń mamandary sý basqan aýyldardaǵy sý deńgeiiniń naqty qandai deńgeige kóterilgenine kóz jetkizý úshin tiisti zerdeleý jumystaryn júrgizýge kirisken.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Keshe Maqtaaraldaǵy ortalyq kollektordan sý syrtqa jaiylyp, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobil jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaidy retteýge aimaqtyń tolyq múmkindigi bar ekenin aitty.
