Maqtaaral aýdanynyń eldi mekenderinen 6,2 million tekshe metr sý soryldy. Bul týraly QR IIM Tótenshe jaǵdailar komitetinen málim etti, dep habarlaidy "Ult aqparat".
«Nurlyjol, Ferdoýsi, Órgebas, Dostyq jáne Jeńis eldi mekenderinen 6,2 mln tekshe metrden astam sý soryldy. Jalpy uzyndyǵy 22 shaqyrym ýaqytsha bógetter salyndy. 87 000-nan astam qap tóseldi jáne sý burý úshin 3 kollektor ornatyldy. Júrgizilgen jumystardyń nátijesinde Órgebas aýylynda avtokólik qozǵalysy úshin ishki avtojoldar ashyldy. Ferdoýsi aýylynda bir táýlikte 10-nan astam aýladan sý soryldy», - delingen komitet aqparatynda.
Vedomstvo málimetinshe, Jeńis, Órgebas jáne Ferdoýsi aýyldarynda Ulttyq ulan jáne Qorǵanys ministrliginiń áskeri qyzmetshileri sý basqan úiler men aýla aýmaqtaryn batpaqtan tazartý jumystaryn júrgizýde. Sonymen qatar, Túrkistan oblystyq tótenshe jaǵdailar departamenti men Shymkent qalalyq tótenshe jaǵdailar basqarmasy Apattar meditsinasy ortalyǵy filialynyń psihologtary art-terapiia ádisterin qoldana otyryp, zardap shekkenderge psihologiialyq kómek kórsetýde.
Jańaturmys, Ferdoýsi, Órgebas, Jantaqsai aýyldarynda qoǵamdyq tártipti qamtamasyz etý úshin 4 blokpost qoiyldy. Táýlik boiy IIM, QO, JAO jáne Ózbekstan TJM kúshteri men quraldary 1626 adam, 324 birlik tehnika, 17 júzý quraly, 217 motopompa jumysyn jalǵastyrýda.
«Maqtaaral aýdanynda tótenshe jaǵdai bolǵaly beri 1 626 adam, 324 tehnika, 17 júzý quraly jáne 217 motopompa apattyq qutqarý jumystaryn jalǵastyryp jatyr. Kesheden beri Ishki ister ministrliginiń jáne jergilikti atqarýshy organnyń bekitilgen tehnikalarynyń, Ózbekstannyń Úkimeti tarapynan jumyldyrylǵan adamdar men kúsh-quraldardyń kómegimen 300 tekshe metrden astam sý sorylyp, qaýipsiz jerge aǵyzyldy», - dedi Túrkistan oblystyq TJD bastyǵy, azamattyq qorǵanys polkovnigi Nurǵali Júnisov.
