Maqtaaral aýdanynyń 7 eldi mekenin sý basý qaýpi áli joǵary. Bul týraly búgin Úkimet otyrysynda Túrkistan oblysynyń ákimi Ómirzaq Shókeev aitty, - dep habarlaidy "Ult aqparat".
«2020 jyldyń 1 mamyrda Ózbekstannyń Syrdariia oblysyndaǵy Sardoba sý qoimasynyń bógeti buzylyp, sekýndyna 120 tekshe metrlik sý ótkizý qaýqary bar Ortalyq Betpaqdala kollektorynan sekýndyna 180 tekshe metr sý aqty. Sonyń saldarynan Maqtaaral aýdanynyń eldi mekenderine sý kelip, tótenshe jaǵdai oryn aldy. Búgingi tańda 31 606 turǵyn 14 eldi mekennen evakýatsiialandy. Onyń ishinde 6 127 turǵyny bar 5 eldi mekendi sý tolyǵymen basty. Bul - Jeńis, Jańa Turmys, Ferdoýisi, Órge bas jáne Dostyq eldi mekenderi», - dedi oblys basshysy.
Onyń dereginshe, 7 eldi mekende sý basý qaýpi áli joǵary. Al eki eldi mekende Myrzakent jáne Aq jol mekenderinde qaýip seiildi. Turǵyndar úilerine qaitty. Ásirese 15 myń halqy bar Myrzakent eldi mekenine sý jibermeý amaldary qarqyndy jasaldy.
«Shuǵyl túrde 2 mamyrda Maqtaaral aýdanynda jergilikti aýqymdaǵy sipatty tótenshe jaǵdai jariialandy. Jedel shtab quryldy. Apattyq qutqarý jumystaryn júrgizý úshin 986 adam, 190 tehnika jumyldyryldy. Sonymen qatar Qyzyzorda, Jambyl oblystary men Shmkent qalasynan 30 motopompa jetkizildi. Munan bólek, Ulttyq ulannyń áskeri bóliminen 413 áskeri qyzmetshi men 37 tehnika tartyldy. Qosymsha Almatydaǵy Ulttyq ulannyń qutqarý batolonynan 320 áskeri qyzmetker, 26 tehnika kelýde», - dedi ol.
Oblys basshysynyń aitýynsha, Atakent kenti men Maqtaaral, Jambyl aýyldyq okrýgterinde mektepterdiń bazasynda 14 qabyldaý-evakýatsiialyq pýnkter uiymdastyryldy.
«Qazirgi tańda 3 200 adam ornalastyryldy. Qalǵandary týǵan-týystarynyń úilerinde. Qabyldaý-evakýatsiialyq pýnktteri qajetti qural-jabdyqtarmen qamtamasyz etildi. Qazirgi karantindik jaǵdaidy eskere otyryp, 120 meditsina qyzmetkeri kómek kórsetýde», - dedi Ó.Shókeev.
