Maqtaaral aýdanynda endi Órgebas eldimekenin sý basty. Bul týraly oblys ákimdigi shuǵyl málimet taratty, dep habarlaidy "Ult aqparat".
«Búgin tańǵy 05.00-ten bastap 250 úii sýǵa batqan Ferdoýsi aýyly baǵytynan Jańajol aýyldyq okrýginiń Órgebas eldimekenine qarai sý kele bastady. Eki aýyldyń ara qashyqtyǵy - 3 shaqyrym. Tańǵy 8.00-de sý Órgebas eldi mekeniniń 194 úiin basyp qaldy. Aýyldyń 1451 turǵyny evakýatsiialandy. Kóshirý barysynda zardap shekkender joq» delingen habarlamada.
Aita keteiik, tótenshe jaǵdai qalyptasqan Maqtaaral aýdanynda sý deńgeii tómendeitin túri joq. Qaita sý basqan aýyldar sany kóbeiip barady. Bastapqyda tórt eldimekenniń halqy qaýipsiz jerge kóshirilse, túnde aýdan ortalyǵynan 12 myńdai adam evakýatsiialanǵan.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý syrtqa jaiylyp, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobil jolyn sý basyp, kólik júre almai otyr. Tórt aýyldan 5400 adam qaýipsiz jerge kóshirilgen.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaidy retteýge aimaqtyń tolyq múmkindigi bar ekenin aitty.
