Túrkistan oblysynda týyndaǵan maqta baǵasyna qatysty máseleni sheshý maqsatynda Túrkistan oblysynyń ákimi Darhan Satybaldy maqta zaýyttarynyń basshylarymen jáne diqandarmen kezdesti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Basqosýǵa óńirdegi mikroqarjy uiymdarynyń basshylary da qatysty. Oblys basshysy sharýalardyń ýájin jetkizip, maqta baǵasyn shuǵyl túrde belgileý kerektigin aitty.
Basqosýda qazirgi tańdaǵy ózekti másele – maqtanyń naqty baǵasyn belgileý, agroqurylymdarǵa tehnikalyq daqyldyń tek shikizat kúiinde eksporttalýyna bailanysty baǵasynyń sheteldik treiderlik kompaniialarǵa táýeldi ekendigi, máseleni tiimdi sheshý úshin jáne sheteldik treiderlik kompaniialardan táýelsiz jumys isteý maqsatynda óńirde maqta klasterin damytýdy qolǵa alý qajet ekendigi keńinen talqylandy.
Oblys ákiminiń tapsyrmasymen Túrkistan oblysy ákiminiń orynbasary Ermek Kenjehanulynyń tóraǵalyǵymen Jetisaida alqaly jiyn ótti. Oǵan oblystyq máslihat depýtattary Jarqynbek Qanaev, Nuraly Ábishov pen Timýr Qyryqbaev, Jetisai aýdanynyń ákimi Murat Qadyrbek pen Maqtaaral aýdanynyń ákimi Baqyt Asanov, óńirdegi barlyq maqta zaýyttarynyń basshylary men mikroqarjy uiymdarynyń basshylary, qos aýdannyń maqta ósirýmen ainalysatyn diqandary qatysty.
Maqta sharýashylyǵymen ainalysatyn aýdandarda diqandar sheteldik treiderlik kompaniialarǵa táýeldi ekendigi jasyryn emes. Bul másele jylda qaitalanýda. Basqosýdyń maqsaty – osy saladaǵy barlyq problemany talqylap, qorytyndy jasap maqtanyń naqty baǵasyn belgileý.
Shitti maqtanyń zaýyttarǵa ótkizý baǵasy álemdik naryqtaǵy maqta talshyǵynyń baǵasyna tikelei táýeldi bolǵandyqtan halyqaralyq Liverpýl maqta birjasynyń indeksine sáikes belgilenedi. Búgingi kúnge halyqaralyq Liverpýl birjasynda orta talshyqty maqta baǵasynyń 1 kelisi boljammen 230 teńgeni qurap otyrǵandyǵy aityldy.
Jiyn barysynda sharýalar men maqta zaýyttarynyń basshylary maqtanyń kelisine 250 teńgeden esep aiyrýǵa, al, saqtaýǵa qoiǵan sharýalarǵa aqpan aiynda sol kezdegi baǵamen aiyrmashylyǵyn tóleý jóninde qorytyndylandy.
Óńdelgen maqtanyń quny shikizatynan áldeqaida qymbat ekeni belgili. Sondyqtan óńirdegi maqta klasterin, onyń ishinde, qaita tereń óńdeýge investitsiia tartyp, salany tereń damytýǵa kúsh sala otyryp, maqta sapasy men ónim kólemin arttyrýǵa kúsh salynady. Sondai-aq basqosýda «Agrarlyq nesie korporatsiiasy» AQ men «Yrys» MKU, ekinshi deńgeili bankter arqyly jeńildetilgen uzaq merzimdi úlken kólemdegi nesie berýdi, nesie alý jumystaryn ońtailandyrý máselelerin qarastyrý kerektigi aityldy.
