Foto: © Sputnik / Timýr Batyrshin
Májilis depýtaty Maqsat Tolyqbai "QTJ" AQ-nyń vagondary ábden tozǵanyn, jazda halyq oǵan bilet tappai qinalatynyn aitty, - dep habarlaidy Massaget.kz portaly.
"Covet zamanynan qalǵan eski vagondar súiretilip áli júr. Temir jol vagonynyń 60 paiyzy toz-tozy shyqqan. Kólik ministrligi olardy 2030 jylǵa deiin jabdyqtaimyz deidi. Biraq bizdiń "QTJ-ǵa" báribir. Óitkeni shekeleri shalqyp júrgen menedjerlerge "Qazaqstan temir jolynyń" quny kók tiyn. 26 jylda jarytpaǵan salany 7 jylda jarylqaidy degenge jan balasy senbeidi. Óitkeni aitatyndary - ertegi men ańyz. 2030 jylǵa deiin qala vagondarynyń 80 paiyzy tozyp, eki qolymyzdy murnymyzǵa tyǵyp otyrmasymyzǵa kepildik bere alasyz ba, ministr myrza?" - dedi depýtat.
Ol bul vagondarǵa otyrý arman bolatynyn ári memleketten salany sýbsidiiadaýǵa qomaqty qarjy bólinetinin jetkizdi.
"Terezesi ashylmaityn, konditsonerleri istemeitin, qabyrǵasynda taraqandar júretin eski vagondardyń ózine jaz mezgilinde bilet tappaisyń. Baǵa óte joǵary. Sóite tura, biletti sýbsidiialaýda jyl saiyn sytyrlatyp milliard sanap beremiz. Poiyzdar jii keshigetinin aitpai-aq qoiaiyn. 1-2 saǵat keshigý úirenshikti jait bolyp qalǵan. Sóite tura, týrizmdi túletemiz deimiz. Bizde týristik marshrýttarǵa arnalǵan strategiialyq jospar kerek. Eski Qazaqstannyń murasy bolyp qalǵan temir jol máselesin qashan sheshesizder? 26 jyl kúttik. Áli qansha kútemiz? Qazaqqa zamanaýi vagondarǵa kezeksiz, tiimdi baǵada minetin kún týa ma?" - dedi Maqsat Tolyqbai.
Suraqqa kólik ministri Marat Qarabaev tolyq jaýap berýge tyrysty.
"Maqsat Málikuly, qazir jalpy Qazaqstan boiynsha 2567 vagon jumys istep tur. Olardyń tozý deńgeiin - 48 paiyz. Siz "olardy qashan jańartamyz" dep suraq qoidyńyz. Biyl 50 jańa vagon aldyq. Qazir kelisimshartqa qol qoidyq. Kelesi jyly taǵy 100 vagon bolady, qosymsha 157 vagondy alýdy pysyqtap jatyrmyz. Sonda tek biyl jáne aldaǵy jylda 304 jańa vagon bolady. Budan basqa, 2025 jyldan bastap Eýropadaǵy eń zamanaýi Stadler (Shtadler) kompaniiasynyń jalpy 537 vagonyn alýdy josparlap otyrmyz. Qazir 2567 vagonnyń ústine taǵy 804 jańa vagon alýǵa qazir qol qoiylyp otyr. Qosymsha vagon alý máselesin áli pysyqtaimyz. Nátijesinde qazir (vagondardyń) ortasha paidalaný merzimi 18 jyl bolsa, qolymyzdaǵy bar kelisimshartqa sáikes (vagondardyń ortasha paidalaný merzimi) 13 jylǵa deiin tómendeidi. Bul - qol qoiylǵan naqty kelisimsharttar", - dedi ol.
