Foto: Májilis
Májilis depýtaty Maqsat Tolyqbaidyń sózinshe Qazaqstanda marapat pen ataqqa degen qumarlyq qaýipti deńgeige jetti. Qazirgi kezde keibir qoǵamdyq uiymdar medal, ordender men «qurmetti ataqtardy» ashyq nemese jasyryn túrde aqshaǵa satady. Bul úrdis ásirese bilim salasyna enip, muǵalimderdiń kásibi deńgeiin emes, marapat sanyna qyzyǵýshylyǵyn arttyrýda. Memlekettik nagradalar bedelin saqtap, ádildik pen ashyqtyqty qamtamasyz etý úshin zańnamalyq normalardy tolyq iske asyrý jáne qoǵamdyq ataqtardyń zańsyz taralýyn qatań baqylaý qajettiligi týyndap otyr. Sondyqtan májilismen Premer-ministrdiń orynbasary – Mádeniet jáne aqparat ministri Aida Balaevaǵa depýtattyq saýal joldady, dep habarlaidy Ult.kz.
«Ataǵy joq, medal almaǵan kim qaldy? Aitaiyn degenim, ataqqumarlyq kádimgi dertke ainalyp barady. Marapat pen ataq – bazarda satylatyn sýviner siiaqty. Ataq satatyn aty belgisiz qoǵamdyq uiymdar medal, ordenderdi shúlen taratqandai ońdy-soldy úlestirip júr. Buǵan ózi toqtam bar ma?», - dep ashyndy Tolyqbai.
Depýtat buǵan deiin de bul máseleni biraz áriptesteri kótergenin, arnaiy zań, norma da qabyldanǵanyn aitty. Alaida onyń pikirinshe bul úrdis kerisinshe údep barady. Máselen, «Qazaqstannyń qurmetti azamaty» tósbelgisi, «Qazaqstannyń eńbek sińirgen qyzmetkeri» medali jáne «Ult ustazy» deitin ataqtar keibir derekterge qaraǵanda, ashyq ne jasyryn túrde 20 myńnan 100 myń teńgege deiingi aralyqta baǵalanady eken. Iaǵni qaltasynda qarjysy nemese tanysy bar kez kelgen adam qoǵamdyq uiym ashyp alyp, ataq taratýmen ainalysa alady.
Maqsat Tolyqbaidyń pikirinshe eń qaýiptisi — bul «marapat biznesiniń» eń aldymen mektepterge enýi.
«Búginde ustazdyń kásibi deńgeii naqty nátije men bilim sapasymen emes, alǵys hat pen medal sany arqyly ólshenetindei jaǵdaiǵa jettik. Sonyń saldarynan muǵalimder oqýshyǵa bilim berýde emes, marapat jinaýda bir-birimen jarysa bastady. Bul — bilim júiesiniń irgetasyn shaiqaltatyn asa qaýipti qubylys. Qaptaǵan ataq taratqysh uiymdardyń kesirinen biz ataq pen marapatty toiǵa aparatyn jai syilyq deńgeiine deiin arzandatyp aldyq», - dep qynjyldy ol.
Osyǵan bailanysty ol tómendegi máseleler boiynsha Úkimetke naqty usynystar joldady:
1. 2025 jylǵy maýsymda qabyldanǵan zańnamalyq ózgeristerdiń tolyq ári tiimdi iske asýyn qamtamasyz etý, memlekettik nagradalar týraly zań normalarynyń oryndalýyna júieli baqylaý ornatý.
2. Qoǵamdyq marapattardy zańsyz taratý faktileri boiynsha ákimshilik jáne ózge de quqyqtyq sharalardy júieli túrde qoldaný, jaýapty tulǵalardyń áreketine naqty quqyqtyq baǵa berý.
3. Memlekettik jáne qoǵamdyq nagradalardyń biryńǵai tirkelimin engizý, tsifrlyq baqylaý men qadaǵalaý tetikterin kúsheitý arqyly marapattaý institýtynyń ashyqtyǵy men bedelin qamtamasyz etý.
