Búgin Aqordada Memleket basshysy N.Nazarbaevtyń qatysýymen «Kóktem shýaǵy» atty kezdesý ótti. Elbasy 8 naýryz – Halyqaralyq áielder merekesine orai bir top áielder qaýymyn qabyldap, qurmet kórsetti. Kezdesýge qatysqan názik jandar qatarynda aqyn, «Jetisý» gazetiniń tilshisi Maqpal Mysa da boldy. Ult.kz portaly aqynmen habarlasyp, kezdesýdiń qalai ótkeni týraly surap-bildi.
«Bul jiynǵa Elbasynyń atynan arnaiy shaqyrtý aldym. Ol týraly Memleket basshysy kezdesý barysynda aityp ótti. «Júz jańa esim» jobasynyń jeńimpazy retinde, aqyn retinde búgingi kezdesýge shaqyrtýdy jón dep tapqan eken. Bul – men úshin qýanysh. Ár túrli salada jetistikke jetken áielder qaýymy jinaldy. Olardyń bastan keshken oqiǵalaryn, taǵdyr jolyn tyńdap otyryp, erekshe áser aldym», – deidi ol.
Maqpal kezdesýdiń joǵary deńgeide ótkenin, ózine jaqsy áser syilaǵanyn atap ótti. Sondai-aq, ol Elbasynyń elimizdegi názik jandardyń qai salada bolsyn, ozyq oiymen, óreli isimen kózge túsip júrgendigin maqtan etip, alǵys-qurmetin jetkizgenin tilge tiek etti.
«Elbasy menen ótken jolǵy «Júz jańa esim» jobasy jeńimpazdarymen bolǵan kezdesýde oqyǵan mahabbat týraly óleńimdi oqyp berýdi surady. Men ol kezdesýde erkin taqyrypta óleń oqyǵanymdy aityp, bul joly el, jer jaiynda oqyǵym keletinin jetkizdim. Sebebi, qazaq poeziiasynyń jarqyn ókilderi Fariza Ońǵarsynova, Marfýǵa Aitqojina, Qanipa Buǵybaeva sekildi apalarymyzdan jolyn jalǵap kele jatqan aqyn arýlardyń qatyr ósip kele jatqanyn aityp, olardyń óleń-jyrlary eń aldymen týǵan elge, týǵan jerge degen súiispenshilikten týǵandyǵyn jetkizip, el jaiynda jazǵan óleńimmen túiindedim», – deidi aqyn.
Sondai-aq, Nursultan Nazarbaev aqynnyń úsh kitabyn arnaiy aldyrtqanyn da aityp ótken eken.
Aita ketsek, Maqpal Mysa – aqyn, jazýshylar jáne jýrnalister Odaǵynyń múshesi. "Alaqandaǵy baqyt", "Men kerekpin" jáne "Aspantaýdyń kóktemi" atty úsh kitap avtory. Aqsý aýdanynyń 80 jyldyǵy jáne Muqaǵali Maqataevtyń 80-jyldyǵyna arnalǵan respýblikalyq baiqaýlarda birinshi oryn alǵan. Molyqbai qobyzshy, Maira Ýáliqyzy, Maǵjan Jumabaev, Sultanmahmut Toraiǵyrov atyndaǵy syilyqtardyń iegeri. Byltyr Resei jazýshylar Odaǵynyń sheshimimen bilikti aýdarma úshin balqar aqyny Kerim Otarov atyndaǵy altyn medalmen marapattalǵan. Sonymen qatar Qazaqstan Tuńǵysh Prezidenti Qory uiymdastyrǵan «Altyn tobylǵy» Respýblikalyq baiqaýynyń bas júldegeri atanǵan.
Maqpal balalar entsiklopediialyq kitaptaryn aýdaryp, redaktsiialaǵan. Onyń óleńderi aǵylshyn, túrik, tatar, bashqurt, orys, qyrǵyz, ázirbaijan jáne ispan sekildi túrli álem tilderine aýdarylǵan. Óleńderi ispan, ázirbaijan, orys antologiialyq kitaptaryna engizilgen. "Altyn tobylǵy" baiqaýynda bas júlde alǵan jáne úsh tilge aýdarylǵan "Shoǵan Abyz" poemasy jaqyn arada jaryqqa shyǵady.
