Atyraý oblysynyń ákimi Mahambet Dosmuhambetov «Teńizshevroil» JShS-niń jańa basshysy Kevin Laiondy qabyldady, dep habarlaidy Atyraý oblystyq kommýnikatsiialar qyzmeti.
Aimaq basshysy kásiporynnyń jańa bas direktory Kevin Laiondy qabyldap, aldaǵy jumysyna sáttilik tiledi.
«Munai-gaz óndirisi salasynda mol tájiribeńiz bar ekenin bilemiz. Ózindik tarihy bar elimizdegi mańyzdy kásiporynnyń odan ary damýyna úlesińizdi qosatynyńyzǵa senemin, - dedi oblys ákimi.
«Teńizshevroil» kompaniiasymen birlese atqarylǵan jobalarǵa toqtalǵan Mahambet Dosmuhambetov «Bolashaq keńeiý jobasynyń» pandemiiaǵa qaramastan ýaqytynda aiaqtalady degen senimin bildirdi.
Budan bólek, aimaq basshysy Mahambet Dosmuhambetov «Teńizshevroil» JShS-niń burynǵy bas direktory Imer Bonnerge birlesken jemisti jumysy pen tyǵyz áriptestik úshin alǵysyn bildirip, jańa qyzmetine sáttilik tiledi.
Óz kezeginde «TShO»-nyń eks-direktory Imer Bonner oblys basshylyǵyna alǵysyn bildire otyryp, kásiporyn men oblys basshylyǵy yntymaqtastyǵynyń ary qarai da jalǵasyn tabatynyna senim bildirdi.
«Osy ýaqytqa deiin oblys ákimdigimen birlesip kóptegen igilikti is jasadyq. Ásirese, pandemiia kezinde biz bir ujym emes, bir Atyraý bolyp birligimizdi kórsettik. Azamattarymyzdyń amandyǵy úshin ózińiz bas bolyp óndiristi te turalatapai, adamdardy da aýyrtyp almaýǵa qatysty talqylaýlarymyz túnge deiin ulasyp, tań atpai jalǵastyrǵan kúnderimiz boldy. Óte qiyn shaqtar bolǵanmen este qalatyn sátterge ainaldy. Qonaqjai qazaq halqyna, óńir jurtyna alǵysymdy bildiremin», - dedi ol.
