Atyraý oblysynyń ákimi Mahambet Dosmuhambetov koronavirýs infektsiiasy boiynsha sanitarlyq-epidemiiaǵa qarsy is-sharalardy uiymdastyrý jónindegi óńirlik shtab komissiiasynyń otyrysyn ótkizdi, dep habarlaidy "Ult aqparat".
Oblys kóleminde atqarylyp jatqan qaýipsizdik sharalary, buǵan deiin berilgen tiisti tapsyrmalardyń oryndalý barysy týraly oblystyq densaýlyq saqtaý basqarmasynyń basshysy Baitolla Ǵazizov baiandady.
«Dúniejúzilik densaýlyq saqtaý uiymy koronavirýsty resmi túrde (indet) pandemiia dep jariialady. Osyǵan bailanysty QR Premer-Ministriniń orynbasary Eraly Toǵjanov birqatar naqty tapsyrma bergen edi. Sondyqtan, oblysymyzda da saqtyq sharalaryn arttyrý úshin biraz is-sharaǵa tyiym salamyn. Buǵan barshańyz túsinistikpen qaraidy dep senemin», - dedi oblys ákimi Mahambet Dosmuhambetov.
Ákim tyiym salynǵan birneshe sharany aitty.
«Birinshiden, 13 naýryzdan bastap barlyq kópshilik is-sharalar, sonyń ishinde merekelik, mádeni-kópshilik, sporttyq sharalar, kinoteatrlarda kórsetilim, konferentsiialar, seminarlar men kórmeler ótkizý toqtatylsyn.
Ekinshiden, barlyq qoǵamdyq oryndar, densaýlyq saqtaý, bilim berý, halyqqa qyzmet kórsetý ortalyqtary, halyq kóp jinalatyn oryndar, qoǵamdyq tamaqtaný oryndary, bazarlar, saýda úileri, vokzal, áýejailar, qonaqúiler kúsheitilgen sanitarlyq - dezinfektsiialyq rejimge kóshirilsin.
Úshinshiden, kanikýl kezinde oqýshylardyń óńirden tys jerlerge ekskýrsiia jasaýyna tyiym salynsyn.
Tórtinshiden, qoǵamdyq kólikter tazalanyp, dezinfektsiialaýdan ótkizilsin.
Besinshiden, orta bilim berý uiymdarynyń kanikýlǵa 2020 jyldyń 16 naýryzynan 5 sáýir aralyǵynda shyǵýy qamtamasyz etilsin. 16 naýryzdan bastap kolledj jáne joǵary oqý oryndary qashyqtyqtan oqytýǵa, sonyń ishinde bilimdi baǵalaýdyń barlyq túrlerin qashyqtyqtan júrgizýge aýystyrylsyn.
Altynshydan, 1a, 1b, 2-3 sanattaǵy elderde ótetin halyqaralyq sporttyq, mádeni jáne týristtik is-sharalarǵa barýǵa tyiym salynsyn», -dep atap ótti óńir basshysy.
