Ekologiiany jaqsartý úshin bizdiń ónerkásipte aitarlyqtai tehnikalyq jáne tehnologiialyq júieli ózgeristerdi iske asyrý qajet. Ekologiia, geologiia jáne tabiǵi resýrstar ministri Maǵzum Myrzaǵaliev jańa Ekologiialyq kodekske qatysty osyndai pikir bildirdi, dep habarlaidy QazAqparat.
Prezident Qasym-Jomart Toqaev jańa Ekologiialyq kodekske úsh kún buryn qol qoiǵan bolatyn.
«Búgingi kúni qoǵamdy ekologiia máseleleri, qorshaǵan ortanyń jaǵdaiy kóp tolǵandyryp keledi. Ekologiia, geologiia jáne tabiǵi resýrstar ministri retinde bul meni, árine, qýantady. Azamattardyń belsendiligi men berik ustanymy bizdi tiimdi sharalar qabyldaýǵa yntalandyratyny sózsiz», - dedi Maǵzum Myrzaǵaliev búgin OKQ-da ótken baspasóz máslihatynda.
Ministrdiń aitýynsha, Prezident Joldaýynda qorshaǵan ortany qorǵaý men bioalýantúrlilikti saqtaý máselelerine airyqsha nazar aýdarylǵan.
«Birinshiden, jańa Ekologiialyq kodeksti qabyldaý týraly aita keteiin. Bul - asa mańyzdy qujat. Ol jan-jaqty talqylandy. Jasyratyny joq, ekologiialyq jáne ekonomikalyq múddeler arasyndaǵy tepe-teńdikti eskerý qajet bolǵandyqtan, qiyndyqtar kezdesti. Ekologiialyq ahýaldy barynsha tez jaqsartamyn degen azamattardyń yqylasyn túsinýge bolady. Alaida bul ahýal bir degende emes, birneshe jyldyń ishinde ońalady. Sebebi ekologiiany jaqsartý úshin bizdiń ónerkásipte aitarlyqtai tehnikalyq jáne tehnologiialyq júieli ózgeristerdi iske asyrý qajet», - dedi ol.
Maǵzum Myrzaǵaliev q abyldanǵan qujatty reformatorlyq dep atady.
«Jáne de ol Ekonomikalyq yntymaqtastyq jáne damý uiymy (OESR) men Eýropa elderiniń ozyq tájiribesin eskere otyryp, pysyqtaldy», - dedi ministr.
