QR Ekologiia, geologiia jáne tabiǵi resýrstar ministri Maǵzum Myrzaǵaliev elimizdiń qai óńirlerindegi egis alqaptarynda sý tapshylyǵy bolýy múmkin ekenin aitty, dep habarlaidy "Ult aqparat".
«Biylǵy vegetatsiialyq kezeńge daiyndyq máselesi de mańyzdy bolyp otyr. 2020 jylǵa arnalǵan gidrologiialyq boljamǵa sáikes, elimizdiń ońtústik jáne batys aimaqtarynda sý az bolýy múmkin. Osyǵan orai biz tiisti sharalar qabyldadyq. Sý qoimalarynyń jumys kestesi qaita qaralyp, ázirlendi. Osy jumys kestelerin daiyndaý barysynda sýarmaly jerlerdi sýmen qamtamasyz etý esepke alyndy. Qazirgi tańda sý qoimalary toltyrylyp jatyr», - dedi ministr Úkimet otyrysynda.
Qyzylorda, Túrkistan, Jambyl jáne Almaty oblystarynda 205 kilometr kanal tazalandy jáne bul jumys ári qarai jalǵasýda. Sondai-aq, 335 gidrotehnikalyq nysan jóndelip, 39 kilometr kanaldar betonmen qaptaldy.
«Sonymen birge, kórshi memleketterde de sý tapshylyǵy baiqalyp otyr. Bul rette olardan bizge qajetti sý kólemi kelmei qalady degen qaýip bar. Osyǵan bailanysty Aýyl sharýashylyǵy ministrligine Túrkistan, Qyzylorda jáne Jambyl oblystarynyń ákimdikterimen birlesip, osy aqparatty dihandarǵa, sharýashylyq ielerine jetkizýdi suraimyz. Osy jaitty eskere otyryp, olar daiyndyq jumystaryn júrgizý qajet. Biz óz tarapymyzdan ózbek, qyrǵyz jáne tájik áriptesterimizben tiisti jumys júrgizip jatyrmyz. Bizdiń basty nazarda – Syrdariia, Shý, Talas ózenderi, sondai-aq memleketaralyq kanaldar boiynsha Túrkistan, Qyzylorda jáne Jambyl oblystaryna qajetti sý túsýin qamtamasyz etý. Osyǵan orai, videobailanys arqyly 10 sáýirde sý sharýashylyq ministrlikteriniń arasynda konsýltatsiialar ótkizý josparlanǵan», - dedi M. Myrzaǵaliev.
