Ekologiia, geologiia jáne tabiǵi resýrstar ministri Maǵzum Myrzaǵaliev QR Ákimshilik quqyq buzýshylyq týraly kodeksine ekologiia máseleleri boiynsha qandai ózgerister men tolyqtyrýlar engizý kerektigin aitty, dep habarlaidy QazAqparat.
Ákimshilik quqyq buzýshylyq týraly kodekske ózgerister men tolyqtyrýlar engizý týraly ministr Parlament Májilisinde tolyǵyraq aityp berdi.
«Negizi profilaktikalyq tekserýler jylyna bir retten kóp ótkizilmeidi. Sonyń saldarynan tekseris kezinde bir nemese odan kóp jyl buryn jasalǵan quqyqbuzýshylyqtary anyqtalǵan kásiporyndar tiisti jazadan qutylyp ketip jatady. Taǵy bir aita keterligi, tájiribe kórsetip otyrǵandai, keibir iri kásiporyndar júieli túrde jyl saiyn bir quqyqbuzyshýlyqqa birneshe ret jol beredi. Osyǵan orai zań jobasynda 3 jyldyń ishinde ekologiialyq zańnamany júieli buzatyn iri kásiporyndarǵa qatysty neǵurlym qatań jaza qoldaný qarastyrylǵan», - dedi Maǵzum Myrzaǵaliev.
Ministrdiń aitýynsha, negizi atalǵan norma qazir de bar, biraq eskirý merzimi bir jyl bolǵandyqtan retsidiv institýty iske aspai jatyr.
«Bul óz kezeginde iri kásiporyndy júieli quqyqbuzýshylyqtar jasamaýǵa yntalandyrmaidy. Osyǵan bailanysty merzim 3 jylǵa deiin uzartyldy. Qorshaǵan ortany qorǵaý salasyndaǵy ákimshilik quqyqbuzýshylyq úshin belgilenetin aiyppuldardy ulǵaitýǵa basty sebepshi bolǵan jait - tabiǵat paidalanýshylardyń qorshaǵan ortanyń lastanýyna jol bermeý boiynsha sharalardy tolyqqandy oryndamaýy jáne qajetti modernizatsiiany júzege asyrmaýy. Negizi qazirgi ákimshilik aiyppuldar yntalandyrý tetigi bola almai tur. Bir sózben aitsaq, tabiǵat paidalanýshylary úshin quqyqbuzýshylyq pen jibergen olqylyqtardy joiýdyń ornyna aiyppul tóleý áldeqaida tiimdirek», - dedi ol.
Ministrlik sol sebepti ekologiialyq quqyqbuzýshylyqtar úshin sanktsiialardy qatańdatý kózdeýde. Mysaly qorshaǵan ortaǵa normativten tys jáne ruqsatsyz emissiialar úshin ákimshilik sanktsiialardyń mólsheri 10 ese, al qalǵan quqyqbuzýshylyqtar boiynsha orta eseppen 2 ese ulǵaiady.
Aita ketsek búgingi Parlament Májilisiniń otyrysynda Ekologiia, geologiia jáne tabiǵi resýrstar ministri Maǵzum Myrzaǵaliev Ekologiialyq kodeksiniń jobasyn qorǵaǵan bolatyn.
