Astanadaǵy kitap kórmesi ótip jatqan «Kórme» ortalyǵynda aqyn Maǵjan Jumabaevtyń 9 tilge aýdarylǵan 3 kitabynyń tusaýkeseri bolyp ótti. Kitaptardyń aýdarylýyna Halyqaralyq Túrki akademiiasy (TWESCO) muryndyq bolyp otyr, dep habarlaidy QazAqparat tilshisi.
Tusaýkeserde sóz sóilegen Túrki akademiiasynyń prezidenti Darhan Qydyráli aqynnyń óleńderin aýdarýǵa bilikti mamandar tartylǵanyn atap ótti.
«Maǵjan aqyn ómirin Túrkistanǵa arnaǵan Ortalyq Aziianyń ortaq aqyny. Táýelsizdik pen tutastyqty, ásemdik pen batyrlyqty, eldikti jyrlaǵan tulǵa. Biz Túrki akademiiasy biylǵy jyldy Aitmatovtyń 90 jyldyǵy jáne Maǵjan Jumabaevtyń 125 jyldyǵy dep jariialadyq. Osy jyl aiasynda Maǵjannyń jyrlary 9 tilge aýdaryldy. Atap aitqanda, aǵylshyn, túrik, ázerbaijan, mońǵol, ózbek, qyrǵyz, altai, bashqurt tilderine aýdarylyp otyr. Qazirgi ýaqytta aqynnyń óleńderi basqa tilderge de tárjimalanyp jatyr. Sondyqtan, osy aptanyń sońynda IýNESKO-da ótetin M.Jumabaev pen Sh.Aitmatovqa bailanysty úlken jiynnyń aldynda kitap kórmesinde Jazýshylar odaǵymen aqyldasyp, búgingi tusaýkeserdi ótkizýdi jón dep tapqan edik», - dedi ol.
Kitaptyń biri taza ózbek tilinde jaryq kórgen. Úsh kitaptyń biriniń tusaýyn kesken Qazaqstan Jazýshylar Odaǵynyń tóraǵasy, aqyn Ulyqbek Esdáýlet shara barysynda Maǵjan Jumabaevtyń «Men jastarǵa senemin» atty óleńin oqyp berdi.
Aqynnyń aitýynsha, Túrki akademiiasynyń belsene kirisip, Maǵjannyń 125 jyldyǵyna shyǵaryp otyrǵan 9 tildegi jinaǵy buryn sońdy bolmaǵan basylym.
«Aqyn alpysynshy jyldary aqtalǵanymen, shyǵarmalaryna tyiym salynyp, óleńderi jaryq kórmei kelgen. Sekseninshi jyldardyń aiaǵynda arystarmen birge aqtalǵannan keiin aqynnyń shyǵarmalary arhivterden jaryq kóre bastady. Buryn Maǵjannyń túrik tilinde shyqqan óleńderi bizdiń Ǵabit Músirepovte ǵana bolǵan edi. Ol kisi bizge bere qoia ma? Ony bizdiń Rymǵali Nurǵaliev sekildi ǵulama ǵalymdarymyz aqyryndap surap alyp oqyp, kóshirip alyp, Jarasqan Ábdiráshev, Nesipbek Aitulylaryna berip, olardan biz kóshirip, Maǵjandy esikti bekitip alyp oqityn edik. Mine, qazir Maǵjannyń óleńderi búkil álemniń igiligine ainalyp otyr. Kitaptardyń ǵumyry uzaq, taralymy kóp bolsyn», - dedi Ulyqbek Esdáýlet.
Jiyn sońyna qarai Darhan Qydyráli Maǵjannyń óleńin ár tilderde sóiletken, atap aitqanda altai tiline aýdarǵan Buryntai Bediýrovke, ázerbaijan tiline aýdarǵan Fizýli Majidige, bashqurt tilinde sóiletken Ahat Salihovqa, túrik tiline aýdarǵan Ali Akpashqa, ózbek tilinde jeke jinaq retinde shyǵarǵan Muzafar Ahmatqa, qyrǵyz tiline aýdarǵan Akbar Rysqulǵa, mońǵol tiline aýdarǵan Júkel Hamai men Aqedil Toishanulyna jáne basqa da aýdarmashylarǵa alǵysyn bildirdi.
