Tobyl-Torǵai aqyndyq mektebiniń iri ókilderiniń biri - Faizolla Satybaldyulynyń esh jerde jaryq kórmegen shyǵarmalary tabyldy, dep habarlaidy QazAqparat.
Faizolla aqynnyń buryn jariialanbaǵan úsh dastany jáne taǵy birshama óleńderin Amangeldi aýdany, Qarasý aýylynyń turǵyny Qanen Qorjynuly jazyp alǵan. Qanen Qorjynuly - Faizolla Satybaldyulynyń óleńderin eń alǵash aýdaryp, el aýzyndaǵy áńgimelerdi jazyp alyp, qaǵaz betine túsirgen kisilerdiń biri. Qoljazbany onyń uly Myrzabek aqsaqal taýyp alǵan. Ol kisi qazir osy Qarasý aýylynda turady.
Arqalyq qalasyndaǵy Dala ólkesi tarihy oblystyq murajaiynyń ǵylymi qyzmetkeri Batyrlan Saǵyntaevtyń sózinshe, Qanen - ózi de aqyn bolǵan kisi. Jazǵan birneshe dastany, arnaý óleńderi bar. Soǵysta júrip jazǵan óleńderi el ishine keń taralǵan.
«Qanen Qorjynuly Faizolla, Álmaǵambet, Sát aqyndardyń óleńderin, halyq aýyz ádebieti úlgilerin jinap, qoljazba qorlaryna tapsyryp turǵan. Sońǵy tabylǵan qoljazbada Faizolla aqynnyń «Ómirbaian», «Uzaq jol», «Toqymbet», «Marhýma», «Aiattan alynǵan sóz» sekildi birneshe dastany men óleńderi bar. Qoljazba 195 betten turady. Óleńder kirillitsada jazylǵan. 18 jazba qamtylǵan. Bul - Faizolla Satybaldyulynyń shyǵarmashylyǵyn zerttep, zerdeleimin degender úshin taptyrmas qazyna», - deidi Batyrlan Saǵyntaev.
Faizolla Satybaldyuly - HIH ǵasyrda qalyptasyp, ózindik dástúr ereksheligi bar mektep jasaǵan Torǵai aqyndyq mektebiniń iri ókili. Ol 1883 jyly esimi orta Aziiaǵa belgili Satybaldy ishannyń otbasynda dúniege kelgen. Jasynan dini bilim alyp, Troitskide, Buharada medresede oqyp quran qari ataǵyn alǵan Faizolla dini saýattylyǵymen birge arab, parsy, túrki halyqtarynyń ańyz-áfsanalaryn, ertegi, jyrlaryn jaqsy bilgen. Túrli taqyryptarǵa qalam tartyp, jyrlar jazyp artyna mol mura qaldyrǵan. «Aiqap» jýrnalyna oqý-aǵartý, sharýashylyq máselelerin kóterip maqalalar jazyp turǵan. Ahmet Baitursynuly, Mirjaqyp Dýlatov, Ahmetsapa Júsipuly sekildi Alashorda ókilderimen aralas-quralas, syilas bolǵan Faizolla kóp qýǵyn-súrgin kórgen. 1959 jyly óziniń týǵan jerinde dúnieden ótken.
