توبىل-تورعاي اقىندىق مەكتەبٸنٸڭ ٸرٸ ٶكٸلدەرٸنٸڭ بٸرٸ - فايزوللا ساتىبالدىۇلىنىڭ ەش جەردە جارىق كٶرمەگەن شىعارمالارى تابىلدى, دەپ حابارلايدى قازاقپارات.
فايزوللا اقىننىڭ بۇرىن جارييالانباعان ٷش داستانى جەنە تاعى بٸرشاما ٶلەڭدەرٸن امانگەلدٸ اۋدانى, قاراسۋ اۋىلىنىڭ تۇرعىنى قانەن قورجىنۇلى جازىپ العان. قانەن قورجىنۇلى - فايزوللا ساتىبالدىۇلىنىڭ ٶلەڭدەرٸن ەڭ العاش اۋدارىپ, ەل اۋزىنداعى ەڭگٸمەلەردٸ جازىپ الىپ, قاعاز بەتٸنە تٷسٸرگەن كٸسٸلەردٸڭ بٸرٸ. قولجازبانى ونىڭ ۇلى مىرزابەك اقساقال تاۋىپ العان. ول كٸسٸ قازٸر وسى قاراسۋ اۋىلىندا تۇرادى.
ارقالىق قالاسىنداعى دالا ٶلكەسٸ تاريحى وبلىستىق مۇراجايىنىڭ عىلىمي قىزمەتكەرٸ باتىرلان ساعىنتاەۆتىڭ سٶزٸنشە, قانەن - ٶزٸ دە اقىن بولعان كٸسٸ. جازعان بٸرنەشە داستانى, ارناۋ ٶلەڭدەرٸ بار. سوعىستا جٷرٸپ جازعان ٶلەڭدەرٸ ەل ٸشٸنە كەڭ تارالعان.
«قانەن قورجىنۇلى فايزوللا, ەلماعامبەت, سەت اقىنداردىڭ ٶلەڭدەرٸن, حالىق اۋىز ەدەبيەتٸ ٷلگٸلەرٸن جيناپ, قولجازبا قورلارىنا تاپسىرىپ تۇرعان. سوڭعى تابىلعان قولجازبادا فايزوللا اقىننىڭ «ٶمٸربايان», «ۇزاق جول», «توقىمبەت», «مارحۋما», «اياتتان الىنعان سٶز» سەكٸلدٸ بٸرنەشە داستانى مەن ٶلەڭدەرٸ بار. قولجازبا 195 بەتتەن تۇرادى. ٶلەڭدەر كيريلليتسادا جازىلعان. 18 جازبا قامتىلعان. بۇل - فايزوللا ساتىبالدىۇلىنىڭ شىعارماشىلىعىن زەرتتەپ, زەردەلەيمٸن دەگەندەر ٷشٸن تاپتىرماس قازىنا», - دەيدٸ باتىرلان ساعىنتاەۆ.
فايزوللا ساتىبالدىۇلى - حٸح عاسىردا قالىپتاسىپ, ٶزٸندٸك دەستٷر ەرەكشەلٸگٸ بار مەكتەپ جاساعان تورعاي اقىندىق مەكتەبٸنٸڭ ٸرٸ ٶكٸلٸ. ول 1883 جىلى ەسٸمٸ ورتا ازيياعا بەلگٸلٸ ساتىبالدى يشاننىڭ وتباسىندا دٷنيەگە كەلگەن. جاسىنان دٸني بٸلٸم الىپ, ترويتسكٸدە, بۇحارادا مەدرەسەدە وقىپ قۇران قاري اتاعىن العان فايزوللا دٸني ساۋاتتىلىعىمەن بٸرگە اراب, پارسى, تٷركٸ حالىقتارىنىڭ اڭىز-ەفسانالارىن, ەرتەگٸ, جىرلارىن جاقسى بٸلگەن. تٷرلٸ تاقىرىپتارعا قالام تارتىپ, جىرلار جازىپ ارتىنا مول مۇرا قالدىرعان. «ايقاپ» جۋرنالىنا وقۋ-اعارتۋ, شارۋاشىلىق مەسەلەلەرٸن كٶتەرٸپ ماقالالار جازىپ تۇرعان. احمەت بايتۇرسىنۇلى, مٸرجاقىپ دۋلاتوۆ, احمەتساپا جٷسٸپۇلى سەكٸلدٸ الاشوردا ٶكٸلدەرٸمەن ارالاس-قۇرالاس, سىيلاس بولعان فايزوللا كٶپ قۋعىن-سٷرگٸن كٶرگەن. 1959 جىلى ٶزٸنٸڭ تۋعان جەرٸندە دٷنيەدەن ٶتكەن.
