Maǵjan Iliiasov Qazaqstan Respýblikasynyń Birikken Ulttar Uiymy janyndaǵy Turaqty ókili qyzmetine taǵaiyndaldy, dep habarlaidy "Ult aqparat".
«Maǵjan Janbotauly Iliiasov Qazaqstan Respýblikasynyń Birikken Ulttar Uiymy janyndaǵy Turaqty ókili qyzmetine taǵaiyndaldy.
Ol Qazaqstan Respýblikasynyń Niderland Koroldigindegi Tótenshe jáne Ókiletti Elshisi qyzmetinen, Himiialyq qarýǵa tyiym salý jónindegi uiym janyndaǵy Qazaqstan Respýblikasynyń Turaqty ókili qyzmetin qosa atqarýdan bosatyldy», - delingen Aqorda aqparatynda.
Maǵjan Janbotauly Iliiasov 1974 jylǵy 26 tamyzda Almaty qalasynda týǵan. Qazaq memlekettik álem tilderi ýniversitetiniń Halyqaralyq qatynastar fakýltetin úzdik bitirgen jáne Dj. Kennedi atyndaǵy Garvard ýniversitetiniń Memlekettik basqarý mektebiniń magistratýrasyn aiaqtaǵan.
Diplomatiialyq mansabyn 1996 jyly QR SIM Halyqaralyq uiymdar men halyqaralyq ekonomikalyq qatynastar basqarmasynyń referenti, keiinnen Attashesi laýazymdarynan bastady. 1998-1999 jyldary BUU Basqarmasy jáne halyqaralyq ekonomikalyq uiymdar basqarmasynyń úshinshi, ekinshi hatshysy qyzmetterin atqarǵan.
1999 jyldan 2003 jylǵa deiin QR Prezidenti Ákimshiliginiń protokol qyzmetiniń konsýltanty bolyp jumys istedi. Odan keiin 2003-2005 jyldary - QR Prezidenti Keńsesiniń Uiymdastyrý jáne qujattamalyq qamtamasyz etý tobynyń bas sarapshysy. 2005-2012 jyldary QR Prezidenti Ákimshiliginiń Syrtqy saiasat ortalyǵynda jumys istedi, onda bas sarapshydan Ortalyq meńgerýshisi laýazymyna deiin jetti. 2013-2016 jyldary QR Prezidentiniń Keńesshisi - QR Prezidenti Ákimshiligi Syrtqy saiasat ortalyǵynyń meńgerýshisi boldy.
Qazaqstannyń BUU janyndaǵy Turaqty ókili bolyp taǵaiyndalǵanǵa deiin 2016 jyldan bastap Qazaqstannyń Niderlandtaǵy Elshisi jáne Qazaqstan Respýblikasynyń Himiialyq qarýǵa tyiym salý uiymyndaǵy turaqty ókili boldy.
I synypty Tótenshe jáne Ókiletti Ýákil diplomatiialyq dárejesine ie. Aǵylshyn jáne nemis tilderin meńgergen.
