Magistratýra men doktorantýraǵa túsý úshin qujattardy qabyldaý merzimi 18 qarashany qosa alǵandaǵy merzimge deiin uzartyldy. Bul týraly Bilim ministrligi jáne ǵylym ministrligi habarlady.
Esterińizge sala keteiik, 1 qarashada magistratýraǵa túsý úshin ekinshi keshendi testileýge jáne doktorantýraǵa túsý emtihandaryna qujattar qabyldaý bastalǵany týraly jariialanǵan bolatyn.
Qazaqstandyqtardyń ótinishterin eskere otyryp, endi keshendi testileýge qatysý úshin ótinim berý merzimi taǵy úsh kúnge uzartyldy.
Buǵan deiin Bilim jáne ǵylym ministri Ashat Aimaǵambetov áleýmettik jelilerdegi paraqshalarynda magistratýra men doktorantýraǵa qabyldaý jylyna eki ret, iaǵni dástúrli túrde jazda jáne qosymsha qysta ótetinin habarlaǵan bolatyn.
«Ministrlik stýdentterdiń múddelerin árqashan birinshi orynǵa qoiady. Sondyqtan ministr oqýǵa túsý úshin taǵy bir múmkindik berý týraly sheshim qabyldady. Testterdi sátti tapsyrǵan jaǵdaida úmitkerler jazǵy qabyldaý qorytyndysy boiynsha artyq qalǵan granttardy utyp ala alady» , — dep atap ótti Bilim jáne ǵylym vitse-ministri Qýanysh Erǵaliev.
Esterińizge sala keteiik, magistratýraǵa ekinshi keshendi testileýge jáne doktorantýraǵa túsý emtihandaryna qatysý úshin tirkelý QR BǴM Ulttyq testileý ortalyǵynyń app.testcenter.kz saity arqyly júrgiziledi. Magistratýraǵa keshendi testileý jáne doktorantýraǵa túsý emtihandary 2021 jylǵy 19 qarasha bastalyp, 11 jeltoqsanǵa deiin jalǵasady.
Bilim berý granttaryn taǵaiyndaý konkýrsyna qatysý úshin qujattar 2021 jylǵy 25 jeltoqsanǵa deiin qabyldanady. Oqýǵa qabyldaý 2021 jyldyń 26 jeltoqsany men 2022 jyldyń 10 qańtary aralyǵynda júrgiziledi.
