Magistratýraǵa túsý emtihanyna óz ornyna bireýdi kirgizbek bolǵandar kelesi jyly qaita tapsyra alady ma? Bul suraqqa Ulttyq testileý ortalyǵynyń direktory mindetin atqarýshy Didar Smaǵulov jaýap berdi, dep habarlaidy QazAqparat.
«Magistratýraǵa óz ornyna bireýdi kirgizbek bolǵandarǵa keleshekte qaita túsýge múmkindik bola ma? Qazirgi zańnamaǵa sáikes, múmkindik bolady. Biraq men erejege ózgeris engizý kerek dep sanaimyn. Sebebi, kisi óz ornyna basqa adamdy jiberse, keleshekte jol bermeý kerek dep sanaimyn», - dedi Didar Smaǵulov búgin Ortalyq kommýnikatsiialar ortalyǵynda ótken baspasóz máslihatynda.
Onyń aitýynsha, bógde adamdy kirgizgen úmitkerge keleshekte magistratýraǵa tapsyrý quqyǵy múlde berilmeýi múmkin.
«Biraq, ol meniń oiym. Ereje qalai qabyldanatynyn aita almaimyn», - dedi ol.
Eske sala ketsek, buǵan deiin Didar Smaǵulov osy jyldyń 10-15 tamyzy aralyǵynda magistratýraǵa túsý úshin ótkizilgen keshendi testileýdiń qorytyndysyn jariialaǵan bolatyn.
Onyń aitýynsha, 25 úmitker testileýge óz ornyna basqa bireýdi kirgizbek bolǵan.
