Belarýs prezidenti Aleksandr Lýkashenko 9 tamyzdaǵy sailaý aldynda saiasi qarsylastaryn 90 jyldardaǵydai eldiń "byt-shytyn "shyǵarǵysy keletin "shetel agentteri" dep aiyptady. Ol óz qarsylastaryn "shetten aqsha alyp otyr" deidi.
Lýkashenko qarsylastarynyń 1994 jylǵy Konstitýtsiiany qaitarý týraly talabyn oryndamaitynyn aitty. 94 jylǵy Konstitýtsiiaǵa sai, prezident tek eki ret sailaýǵa túse alatyn.
"Elde ózgeristi, reformany, eski Konstitýtsiiany qaitarýdy talap etip júrgender 90 jyldardaǵy qiyn jaǵdaiǵa ákelgisi keledi. Taý-taý altyn ýáde etkenderge senbeńizder" dedi Lýkashenko 4 tamyzda parlamenttegi joldaýynda.
Ol "94 jylǵy Konstitýtsiiany qaitarsaq, elde anarhiia ornaidy. Bul Konstitýtsiiany qaitarsaq, qylmyskerlerge syilyq jasaǵanymyz. 90 jyldardaǵy jabaiy ómirge oralmaimyz" dedi. Lýkashenkonyń ózi osy Konstitýtsiia kezinde prezident bolyp sailanǵan edi.
"Eldiń shyrqyn buzý úshin milliard [aqsha] jumsalyp jatyr. Sondyqtan belarýstyqtardyń Lýkashenkoǵa qarsy shyǵatyn negiz joq. Al Lýkashenkoǵa qarsylardyń bári – shetel agenti" deidi ol.
Batys diplomattary Belarýsty Eýropadaǵy eń sońǵy diktatorlyq el dep ataidy. Eldi 26 jyl basqarǵan Lýkashenko 9 tamyz aldynda qiyn jaǵdaiǵa tap boldy. Belarýsta prezidenttikke kandidat Svetlana Tihanovskaianyń sailaýaldy sharalaryna myńdaǵan adam kelip júr. Eriktilerdiń esebinshe, Minsktegi Tihanovskaianyń sharasyna kem degende 63 myń adam kelgen. Sailaý aldynda elde Lýkashenkoǵa degen qarsylyq ta kúsheidi. Jurttyń kóbi elde ózgeris bolǵanyn qalaidy.
Biraq biraz sarapshy Lýkashenko túrli quityrqy áreketter jasap, sailaýdy jeńiske jetedi dep oilaidy.
Lýkashenko 4 tamyzdaǵy joldaýynda saiasi qarsylastary Belarýs jastaryn "saiasi maqsatta qoldanyp otyr" dep te aiyptady.
Lýkashenkonyń qarsylasynyń biri, elde qamalý qaýpinen soń Kievke ketken Valeriia Tsepkalo "Nastoiashee vremia" telearnasyna bergen suhbatynda "sailaýdan keiin elde jappai narazylyq bastalsa, Lýkashenko elden qashyp ketedi" dedi.
Tsepkalonyń paiymdaýynsha, myńdaǵan adam narazylyqqa shyqsa Lýkashenko ásker men arnaiy jasaqty qoldanýy múmkin, al júzdegen myń adam narazylyq tanytsa, áskerge buiryq bere almaidy.
"Belarýs áskeri óz halqyna qarsy shyǵady dep oilamaimyn" dedi ol.
Lýkashenkonyń qarsylasy Svetlana Tihanovskaia sailaýda jeńiske jetse elde qaita prezident sailaýyn ótkizýge ýáde bergen.
Batys elderi men EQYU Belarýs elindegi birde-bir sailaýdy zańdy ótti dep moiyndamaǵan.
