«Astana Operanyń» keremet jetekshi solisteri áigili opera ánshisi Evgenii Nesterenkonyń 80 jyldyǵyna arnalǵan «Maestroǵa arnaý» kontsertin usynady. Ataqty bas repertýaryndaǵy týyndylar jáne álemdik mýzykalyq ónerdiń jaýharlary 31 qańtar kúni teatrdyń Kameralyq zalynda shyrqalady.
Evgenii Nesterenko – KSRO Halyq ártisi, Sotsialistik Eńbek Eri, Lenindik syilyq pen «Gremmi» júldesiniń (AQSh) laýreaty, Avstriianyń Kammerzengeri, professor, akademik, kóptegen eń bedeldi halyqaralyq marapattardyń, mártebeli syilardyń, orden-medaldardyń iegeri. Kishi opera teatrynyń, S.M. Kirov atyndaǵy Leningrad opera jáne balet teatrynyń (Mariin teatry), Memlekettik akademiialyq Úlken teatrdyń solisi. Aty ańyzǵa ainalǵan ánshi álemniń úzdik sahnalarynda, sonyń ishinde La Skala (Milan, Italiia), Metropoliten-Opera (Niý-Iork, AQSh), Kovent-Garden Koroldik opera teatry (London, Ulybritaniia), Kolon teatrynda (Býenos-Aires, Argentina), sonymen qatar Vena (Avstriia), Miýnhen (Germaniia), San-Frantsisko (AQSh) jáne ózge elderdiń iri sahnalarynda 50-den astam jetekshi partiialardy oryndaǵan.
E. Nesterenko jasaǵan kóptegen jarqyn beinelerdiń arasynda M. Mýsorgskiidiń attas operasyndaǵy Boris Godýnov partiiasy birinshi orynǵa ie. Osy keshte, Boris ariialarynan basqa, aitýly ánshiniń qorjynyndaǵy týyndylar, atap aitqanda, P. Chaikovskiidiń «Evgenii Onegin» operasynan Gremin ariiasy, «Mazepa» operasynan Kochýbei ariiasy jáne t.b. shyǵarmalar tyńdaýshylar nazaryna usynylady.
Sondai-aq baǵdarlamaǵa maestronyń súiikti operalarynyń úzindileri engen, olar – Dj. Verdidiń «Don Karlos» operasynan Rodrigo ariiasy, P. Chaikovskiidiń «Qarǵanyń mátkesi» operasynan Eletskii ariiasy, «Evgenii Onegin» operasynan Onegin ariiasy, «Iolanta» operasynan Robert ariiasy, «Mazepa» operasynan Kochýbei ariiasy, M. Mýsorgskiidiń «Hovanshina» operasynan Marfanyń bal ashýy, N. Rimskii-Korsakovtyń «Patsha qalyńdyǵy» operasynan Liýbasha men Griaznoi dýeti men kórinisi jáne t.b. Ataqty ártistiń janyna jaqyn án-romanstary - R. Shýmannyń «Arnaý», P. Chaikovskii, S. Rahmaninov, N. Rimskii-Korsakov, G. Sviridovtyń ánderi men romanstary shyrqalady.
Kontsertke maestro Nesterenkonyń shákirtteri men izbasarlary – «Astana Operanyń» jetekshi solisteri: Qazaqstannyń eńbek sińirgen qairatkerleri Aigúl Niiazova, Dina Hamzina, Armeniianyń Halyq ártisi Barseg Týmanian, sonymen birge shaqyrylǵan bariton, Qazaqstannyń eńbek sińirgen qairatkeri Azamat Jyltyrkózov qatysady. Fortepiano partiiasynda – halyqaralyq baiqaýlardyń laýreaty Raýshan Beskempirova, Láilá Seiitova, Dolores Úmbetálieva.
- Evgenii Evgenevich Nesterenko – qazirgi zamanǵy opera óneriniń birtýar uly qairatkerleriniń biri, álemdik deńgeidegi iri tulǵa. Odan kóp tálim alýǵa bolady, onyń sirek kezdesetin vokaldyq daryny, ártistigi, áýendiligi, kemeldenýge degen umtylysy, jumysqa degen erekshe qabileti jan tebirentedi. Jas áriptesteri men shákirtterine degen sheksiz meiirimi bola tura, ol ózine asqan talappen qaraidy. Osy kontsert arqyly HH ǵasyrdaǵy orasan zor bas ánshiniń biri, álemge tanymal ondaǵan ónerpazdyń talantyn ushtaǵan ulaǵatty ustazǵa degen syi-qurmetimizdi bildiremiz. Maestroǵa zor densaýlyq, shyǵarmashylyq tabys jáne ómirdiń bar asylyn tileimiz, - dep atap ótti ártister.
Kontserttiń bastalýy saǵat 19:00-de.
